კობახიძე ვადამდელის უარყოფაზე: არ შეიძლება თვითმართველობის არჩევნების ჭარბი პოლიტიზება

[43%-იანი ბარიერის] დღის წესრიგიდან მოხსნა არის ძალიან კარგი, რადგან, როგორც ვთქვით, ჩვენ ამით დავუბრუნდით კონსტიტუციურ ჩარჩოს. მათ შორის, ეს გამოიხატება იმაშიც, რომ ჩვენ ჩავატარებთ სტანდარტულ ადგილობრივი თვითმართველობის არჩევნებს. ყველამ იცის, ვინც ერკვევა ზოგადად საარჩევნო საკითხებში, რომ არ შეიძლება ადგილობრივი თვითმართველობის არჩევნების ჭარბი პოლიტიზება, ეს არ არის კარგი თვითონ მუნიციპალური არჩევნებისთვის. ადგილობრივი თვითმართველობის არჩევნები უნდა იყოს ადგილობრივი თვითმართველობის არჩევნები, ანუ არჩევნები იმასთან დაკავშირებით, თუ როგორ უნდა კეთილმოეწყოს ქალაქები, სოფლები, როგორ უნდა მოწესრიგდეს მუნიციპალური მომსახურების სისტემები და ასე შემდეგ. ამ კუთხითაც დავუბრუნდით ჩვენს კონსტიტუციურ და ლოგიკურ ჩარჩოს.