საქართველომ ფარმაცევტული კომპანია Gilead-ისგან 4 მილიონი დოლარის ღირებულების 10 000 ფლაკონი ანტივირუსული პრეპარატი რემდესივირი საჩუქრად მიიღო. ინფორმაციას ინფექციური პათოლოგიისა და შიდსის ცენტრის ხელმძღვანელი, თენგიზ ცერცვაძე ავრცელებს.
"ამერიკულმა ფარმაცევტულმა კომპანია Gilead-მა ამ დღეებში დიდი საჩუქარი გაუკეთა საქართველოს და COVID პაციენტებს. უფასოდ (საჩუქრად) გადმოსცა დაახლოებით 4 მილიონი აშშ დოლარის ღირებულების COVID-19-ის სამკურნალო პირდაპირი ანტივირუსული მოქმედების მედიკამენტ რემდესივირის 10 ათასი ფლაკონი და თან ბრენდული მედიკამენტი (Veklury ) და არა ჯენერიკული, რაც ძალიან დაგვეხმარება COVID პაციენტების წარმატებულ მართვაში". – წერს ცერცვაძე.
2020 წლის დეკემბერში შემუშავებული პროტოკოლის თანახმად, საქართველოში რემდესივირი ენიშნებათ მხოლოდ იმ პაციენტებს, ვინც კლინიკაში იმყოფება და ჟანგბადდამოკიდებულია. რემდესივირი ეფექტიანია ინფექციის გამოვლენიდან 10 დღის განმავლობაში.