მთიანი ყარაბაღის სამხედრო კამპანიის აზერბაიჯანის სასარგებლოდ დასრულების აღსანიშნავად ბაქოში სამხედრო აღლუმი იმართება. აღლუმს თურქეთის პრეზიდენტი, რეჯეფ თაიფ ერდოღანიც ესწერება.
"მე ძალიან მოხარული ვარ, რომ ამ დღეს თქვენთან ერთად აღვნიშნავ... აზერბაიჯანის არმიის ჯარისკაცებს ვულოცავ, რომლებმაც ყარაბაღი სამშობლოს დაუბრუნეს". - აღლუმზე სიტყვით გამოსვლისას თქვა ერდოღანმა.
აღლუმში მონაწილობას იღებს თურქეთის არმიაც. თურქი ჯარისკაცები ბაქოში კვირის დასაწყისში ჩავიდნენ.
9 დეკემბერს თურქეთის პრეზიდენტი ბაქოში ორდღიანი ვიზიტით ოფიციალურ პირებთან შესახვედრად ჩავიდა.
შეხვედრის დაწყებამდე აზერბაიჯანის საგარეო საქმეთა მინისტრმა თქვა, რომ აზერბაიჯანის პრეზიდენტი, ილჰამ ალიევი და ერდოღანი განიხილავენ ორმხრივ ურთიერთობას და მთიანი ყარაბაღის რეგიონში არსებულ სიტუაციას.
10 ნოემბერს ცნობილი გახდა, რომ აზერბაიჯანმა, სომხეთმა და რუსეთმა მთიანი ყარაბაღის რეგიონში მიმდინარე კონფლიქტის დასრულების თაობაზე შეთანხმებას მიაღწიეს. სომხეთი და აზერბაიჯანი ცეცხლის შეწყვეტაზე შეთანხმდნენ. გარდა ამისა, მხარეები საკუთარ პოზიციებზე დარჩებიან და, შესაბამისად, აზერბაიჯანს დარჩება ყველა ის ტერიტორია, რაც 27 სექტემბერს შეიარაღებული დაპირისპირების დაწყების შემდეგ აიღო. რეგიონში ასევე განლაგდებიან რუსი სამშვიდობოები.
რუსეთმა უკვე დაიწყო შეთანხმების მიხედვით რეგიონში სამშვიდობო ძალების განთავსება, აზერბაიჯანი კი ეტაპობრივად იკავებს შეთანხმებით განსაზღვრულ რეგიონებს.
მთიანი ყარაბაღის საკითხზე შეთანხმების შესახებ შეგიძლიათ, ვრცლად წაიკითხოთ აქ.