კომუნიკაციების კომისიამ მედია-კავშირი ობიექტივი არასახელმწიფო ენაზე გასული გადაცემების გამო გააფრთხილა და რუსულ ენაზე განთავსებული პროგრამების სამაუწყებლო ბადიდან დაუყოვნებლივ ამოღება დაავალა.
საქმე ეხება საზოგადოებრივ-პოლიტიკურ გადაცემებს: ყველას გასაგონად და Неделя, რომლებიც ობიექტივის ეთერში რუსულ ენაზე გავიდა.
"ეს გადაცემები სამაუწყებლო ბადეში კომუნიკაციების კომისიის დადგენილებით დასაშვები ხანგრძლივობის გადაჭარბებით და ასევე, სახელმწიფო ენაზე სუბტიტრების გარეშე განთავსდა" - აღნიშნავს GNCC.
კომუნიკაციების კომისიის დადგენილებისა და მაუწყებლობის შესახებ საქართველოს კანონის შესაბამისად, საქართველოში ავტორიზებული საერთო ეროვნული ტელემაუწყებელი უფლებამოსილია, სამაუწყებლო ბადეში პროგრამები არასახელმწიფო ენაზე განათავსოს ისე, რომ მათი მთლიანი მოცულობა არ აღემატებოდეს მისი დღიური მაუწყებლობის ხანგრძლივობის 10%-ს. ამასთანავე, საუკეთესო დროს არასახელმწიფო ენაზე განთავსებული პროგრამების ხანგრძლივობა არ უნდა აღემატებოდეს საუკეთესო დროის 10%-ს. მაუწყებელი ასევე ვალდებულია, პროგრამა სამაუწყებლო ბადეში განათავსოს საქართველოს სახელმწიფო ენაზე სუბტიტრებით.
"აღნიშნული საზოგადოებრივ-პოლიტიკური გადაცემების ეთერში განთავსებით, მედია-კავშირმა ობიექტივმა ვალდებულებები დაარღვია, რის გამოც, კომუნიკაციების კომისიამ მაუწყებელი გააფრთხილა და არასახელმწიფო ენაზე, კანონმდებლობის დარღვევით განთავსებული პროგრამების სამაუწყებლო ბადიდან დაუყოვნებლივ ამოღება დაავალდებულა" - აცხადებს GNCC.
