პროკურატურის ინფორმაციით, ვარკეთილის "დამპალოს" სასაფლაოზე კონფლიქტი, რა დროსაც, შსს-ს თანამშრომელმა 24 წლის მურად წურწუმია მოკლა, მანქანის გამო დაიწყო. საგამოძიებო უწყების ვერსიით, გარდაცვლილი და მისი ძმა ბრალდებულ ზ. ფ.-ს ავტომანქანას "მართლსაწინააღმდეგოდ დაუფლნენ". ამასთან, პროკურატურა ადასტურებს, რომ სასაფლაოზე ბრალდებულთან ერთად კიდევ ერთი პირი - ვ.ბ იმყოფებოდა, თუმცა, საგამოძიებო უწყება აცხადებს, რომ მურად წურწუმიას სიცოცხლისთვის სახიფათო დაზიანებები მხოლოდ ზ.ფ-მ მიაყენა. ასევე მხოლოდ მას ედება ბრალად გარდაცვლილის ძმის ცემა, თუმცა, "მტკიცებულებათა მოპოვება" გრძელდება.
"დადგინდა, რომ 2020 წლის 2 იანვარს, ღამის საათებში, მ. ჩ. და მ. წ. იმყოფებოდნენ ვარკეთილის მე-3 მასივში, ე.წ. "დამპალოს სასაფლაოს“ ტერიტორიაზე, სადაც ასევე იმყოფებოდნენ ბრალდებული ზ. ფ. და ვ. ბ. ხსენებულ პირებს შორის ურთიერთშელაპარაკება წარმოიშვა მ. ჩ. -ს და გარდაცვლილ მ. წ.-ს მიერ ბრალდებულ ზ. ფ. -ს საკუთრებაში არსებული ავტომანქანის მართლსაწინააღმდეგოდ დაუფლების ნიადაგზე.
ბრალდებული ზ. ფ. შეეცადა ზემოხსენებული პირების შეჩერებას, რა დროსაც სცემა მ. ჩ. და მ. წ. ფიზიკური დაპირისპირება გაგრძელდა რამდენიმე წუთის განმავლობაში, რა დროსაც ბრალდებულმა ზ. ფ.-მ მ. წ.-ს მიაყენა სიცოცხლისათვის სახიფათო სხეულის დაზიანებები, რამაც ამ უკანასკნელის სიცოცხლის მოსპობა გამოიწვია, ხოლო ცემის შედეგად მ. ჩ.-მ განიცადა ფიზიკური ტკივილი" - აცხადებს პროკურატურა.
შინაგან საქმეთა სამინისტროს თანამშრომელი ზ.ფ. პოლიციამ 5 იანვარს დააკავა და საქმე თბილისის პროკურატურის საგამოძიებო ნაწილს გადაუგზავნა. 2020 წლის 6 იანვარს, დაკავებულს ბრალი წარედგენა საქართველოს სისხლის სამართლის კოდექსის 117 -ე მუხლის მეორე ნაწილით და სსკ-ის 126 -ე მუხლის პირველი ნაწილით, რაც გულისხმობს ცემას ან სხვაგვარ ძალადობას, რამაც დაზარალებულის ფიზიკური ტკივილი გამოიწვია. ასევე ჯანმრთელობის განზრახ მძიმე დაზიანებას, რამაც სიცოცხლის მოსპობა გამოიწვია. 2020 წლის 6 იანვარს თბილისის პროკურატურამ სასამართლოს მიმართა ბრალდებულის მიმართ აღკვეთის ღონისძიების სახით პატიმრობის შეფარდების შუამდგომლობით.
პროკურატურის ინფორმაციით, სისხლის სამართლის საქმეზე გრძელდება მტკიცებულებათა მოპოვება და გამოძიება საქართველოს სსკ-ის 117 - ე მუხლის მეორე ნაწილით (ჯანმრთელობის განზრახ მძიმე დაზიანება, რამაც სიცოცხლის მოსპობა გამოიწვია), 117- ე მუხლის მე-6 ნაწილით (ჯანმრთელობის განზრახ მძიმე დაზიანება ჩადენილი ჯგუფურად, რამაც სიცოცხლის მოსპობა გამოიწვია), 126 - ე მუხლის პირველი ნაწილით (ცემა ან სხვაგვარი ძალადობა, ჩადენილი ჯგუფურად), 143- ე მუხლის პირველი ნაწილით (თავისუფლების უკანონო აღკვეთა) და 177-ე მუხლის მესამე ნაწილის "დ" ქვეპუნქტით (ქურდობა სატრანსპორტო საშუალების წინააღმდეგ.
3 იანვრის დილით ვარკეთილის სასაფლაოზე 24 წლის ბიჭი ნაწამები იპოვეს. ოჯახის ინფორმაციით, მურად წურწუმიას თვალი ჰქონდა ამოთხრილი და თავი - გატეხილი. ის თავდამსხმელებმა ტანსაცმლის გარეშე, უგონო მდგომარეობაში მიატოვეს. ოჯახი ბიჭს მთელი ღამის განმავლობაში ეძებდა. კლინიკაში გადაყვანის შემდეგ, ექიმებმა ახალგაზრდა კაცის გადარჩენა ვეღარ შეძლეს.
ოჯახი მურად წურწუმიას წამებით სიკვდილში სპეცრაზმელებს ადანაშაულებს. მომხდარის ერთადერთი თვითმხილველი გარდაცვლილის ძმა, 21 წლის მუხრან წურწუმიაა. ის მთავარ არხს უყვება, რომ მამის საფლავზე ასულ ძმებს ორ სპეცრაზმელთან მოუვიდათ ჩხუბი.
ოჯახის ინფორმაციით, მუხრან წურწუმიამ გაქცევა მოახერხა, მურად წურწუმიამ - ვერა. მთავარი არხის ცნობით, მუხრან წურწუმიას ეგონა, რომ მისი ძმაც გაექცა თავდამსხმელებს. როცა სახლში მისულ მუხრანს მურადი შინ არ დახვდა, ის სასაფლაოზე დაბრუნდა, თუმცა, საფლავზე მხოლოდ სისხლიანი ტანსაცმელი იპოვნა. ამის შემდეგ დაიწყეს მურად წურწუმიას ძებნა.
