ტაბულა
"დატოვოს საკრებულო სამარცხვინო კუხიანიძემ", - ამ მოთხოვნით სამოქალაქო აქტივისტები თბილისის საკრებულოსთან აქციას მართავენ. ერეკლე კუხიანიძის გამონათქვამებს აპროტესტებს "სირცხვილია", შეცვალე", და ალეკო ელისაშვილის სამოქალაქო მოძრაობა. ელისაშვილის თქმით, "არ შეიძლება, ერეკლე კუხიანიძე იყოს თბილისის საკრებულოს წევრი იმ განცხადების და იმ პოზიციის მერე, რაც მან გამოთქვა ცხინვალის ციხეში დატუსაღებულ ჩვენს საამაყო ექიმთან დაკავშირებით".
"ამ კაცმა საკრებულო უნდა დატოვოს, საერთოდ როგორ შედის ამ შენობაში, როგორ ბედავს იქ ყოფნას, ამოვიდეს თავის ფეხით, თქვას, რომ იხდის ბოდიშს და მიდის საკრებულოდან, არ შეიძლება, ჩვენი გადასახადებიდან გადახდილი ფულიდან ხელფასს იღებდეს ეს არამზადა" - ამბობს ელისაშვილი.
ერეკლე კუხიანიძემ საზოგადოების ყურადღება 14 დეკემბერს გამოქვეყნებული Facebook პოსტით მიიპყრო. საკრებულოს წევრმა ოკუპანტების მიერ გატაცებული ექიმის ვაჟა გაფრინდაშვილის ოჯახს "პროვოკატორები", "იდიოტები" უწოდა და აგინა.
ამის შემდეგ მან კიდევ ერთი პოსტი გამოაქვეყნა, სადაც საზოგადოების აღშფოთებულ ნაწილს "ღრმა ფსიქიკური აშლილობის" დიაგნოზი დაუსვა და თქვა, რომ "ვინც იგნორირებას უკეთებს დასავლეთის რჩევას, ურთიერთობები დავალაგოთ რუსეთთან, პროვოკატორად და ქვეყნის მტრად" მიაჩნია.
ასევე, თბილისის საკრებულოს წევრი ქართული ოცნებიდან, ერეკლე კუხიანიძე, 2019 წლის 20 ივნისს Facebook-ზე წერდა, რომ ვინც რუს დეპუტატს სერგეი გავრილოვს "ფიზიკურად შეეხო - ის არის საქართველოს მტერი და სასტიკად დასასჯელია".
