გვინეტ პელტროუს კომპანიას "ვაგინალური კვერცხების" არასწორი რეკლამირება აეკრძალა

გვინეტ პელტროუ Goop-ის სამიტზე
ფოტო: Getty

გვინეტ პელტროუს კომპანია Goop-ს პროდუქციის სამკურნალო თვისებების შესახებ მცდარი ინფორმაციის გავრცელების გამო $145,000-ის ჯარიმა დაეკისრა.

კომპანიას დაზარალებულთათვის კომპენსაციების გადახდაც დაევალა.

ოსკაროსანმა მსახიობმა გვინეტ პელტროუმ 2008 წელს დააფუძნა კომპანია Goop inc, რომელიც კოსმეტიკასთან და სხვა აქსესუარებთან ერთად ყიდის პროდუქტებს, რომელთაც კომპანიის მტკიცებით, გამაჯანსაღებელი ეფექტი აქვთ. მათ შორისაა ნეფრიტის ქვისგან დამზადებული კვერცხი, რომლის ღირებულებაც $66 დოლარია.

4 სანტიმეტრის სიგრძის და 3 სანტიმეტრის სიგრძის კვერცხის ვაგინაში მოთავსება Goop-ის განმარტებით "სპირიტუალურ დეტოქსიკაციას", სექსუალური ენერგიის ზრდას და ჰორმონალური ბალანსის შენარჩუნებას უწყობს ხელს, რაც მის ფორმას და ნეფრიტის ქვის "სამკურნალო" ეფექტებს უკავშირდება. ვაგინალური კვერცხების კიდევ ერთ დადებით თვისებად Goop-ი დეპრესიასთან ბრძოლას ასახელებს. ნეფრიტთან ერთად Goop-ი კვარცის ქვისგან დამზადებულ ვარდისფერ კვერცხსაც ყიდის. კომპანიის ინფორმაციით, შედარებით ბიუჯეტურ, $55 დოლარიან კვერცხსაც ანალოგიური სამკურნალო თვისებები აქვს.

კალიფორნიის შტატის პროკურორებმა Goop-ის წინააღმდეგ მოამზადეს სარჩელი ვაგინალური კვერცხებისა და "დეპრესიის მომხსნელი ზეთის" ჯანმრთელობის ეფექტების შესახებ, რომ კომპანიის არცერთი განცხადება არ იყო მეცნიერულად დასაბუთებული. 4 სექტემბერს სასამართლომ კომპანიას ჯარიმის სახით $145,000-ის გადახდა დააკისრა. Goop-ს აეკრძალა ამ პროდუქტების სარგებლიანობის შესახებ მცდარი ინფორმაციის გავრცელება. ამასთანავე, კომპანიას დაეკისრა $66-ის და $55-ის გადახდა მათთვის, ვინც ეს პროდუქტი შეიძინეს.

კვარცის და ნეფრიტის კვერცხები

Goop-ს საკუთარი პროდუქტების შესახებ მცდარი და ბუნდოვანი ინფორმაციის გავრცელების გამო წარსულშიც აკრიტიკებენ. მათ შორისაა "ყავის ოყნების" გასაკეთებელი $135-დოლარიანი ხელსაწყო "Implant O'Rama".

Goop-ის ინფორმაციით, ყოველდღიურად, ყავის ოყნების გაკეთება ხელს უწყობს ორგანიზმის განწმენდას და დეტოქსიკაციის პროცესს.

თუმცა, აშშ-ის გასტროენტეროლოგთა ასოციაციის შეფასებით, არსებობს არაერთი დადასტურებული შემთხვევა, რომ "ყავის ოყნებმა" კოლონარული სისტემის დაავადებები გამოიწვიეს. აღრიცხულია შემთხვევები, როდესაც ადამიანებმა შედეგად ქიმიური დამწვრობებიც მიიღეს.