საქართველოს პრემიერმინისტრი და კოალიცია ქართული ოცნების ლიდერი ირაკლი ღარიბაშვილი საპარლამენტო უმრავლესობის წევრ გოგი თოფაძის განცხადებებს ემიჯნება. როგორც პრემიერის განცხადებაში წერია, ქართული ოცნებისთვის მნიშვნელოვანია მედიის თავისუფლება და ის, რომ რუსთავი 2-თან დაკავშირებით სასამართლომ მიუკერძოებელი განაჩენი უნდა გამოიტანოს.
"ჩვენ კატეგორიულად ვემიჯნებით პარლამენტის წევრის - ბატონ გოგი თოფაძის პირად მოსაზრებებს ტელეკომპანია „რუსთავი-თან" დაკავშირებით. ასევე, ვემიჯნებით დეპუტატის პოზიციას სტალინთან დაკავშირებით.
კოალიციას აქვს მტკიცე პოზიციები ასეთ ფუნდამენტურ თემებთან მიმართებით და ჩვენ ეს პოზიციები საჯაროდ გვაქვს გაცხადებული.
ჩვენთვის უმნიშვნელოვანესია მედიის თავისუფლება და მიგვაჩნია, რომ "რუსთავი-2-თან" დაკავშირებით ობიექტური, მიუკერძოებელი განაჩენი დამოუკიდებელმა სასამართლომ უნდა გამოიტანოს.
ჩვენ ვართ ევროპული ღირებულებების ერთგული პოლიტიკური კოალიცია, რომელსაც კარგად აქვს გააზრებული საბჭოთა წარსული. ჩვენ დარწმუნებული ვართ, რომ ევროპული და ევროატლანტიკური კურსი - ეს არის სწორი გზა და იგი პრინციპულად განსხვავდება იმ რეჟიმისგან, რომელშიც ათეული წლების განმავლობაში მოგვიწია ცხოვრება.
ჩვენ მივისწრაფვით დემოკრატიული განვითარებისკენ, ევროპული ოჯახისკენ", - წერია განცხადებაში.
შეგახსენებთ, რომ დეპუტატ გოგი თოფაძის თქმით, "რუსთავი 2 აღარ იქნება" და "სტალინის სურათი ყველა კაბინეტში დაიკიდება, რადგან ის გენიალური ადამიანია".
