ქართველმა და ამერიკელმა სამხედროებმა ტაქტიკური სწავლება ჩაატარეს

ქართული და ამერიკული სამხედრო ტექნიკა ბრძოლის ველზე ერთად პირველად გამოჩნდა. ვაზიანში მიმდინარე წვრთნების - "ღირსეული პარტნიორი 2015" - ფარგლებში ქართველმა და ამერიკელმა სამხედროებმა ტაქტიკური სწავლება ჩაატარეს, რომლის სცენარი აეროპორტის და დასახლებული პუნქტის მოწინააღმდეგისგან გათავისუფლებას ითვალისწინებდა. მანევრების მიზანი ნატო-ს სწრაფი რეაგირების ძალებში შემავალი ქართული ასეულის ერთობლივი საბრძოლო მოქმედებებისთვის მომზადებაა.

შეტევა მოწინააღმდეგის მიერ დაკავებულ აეროპორტზე ამერიკელმა სამხედროებმა ქვეითთა საბრძოლო მანქანებით წამოიწყეს. აეროპორტის წარმატებით გათავისუფლების შემდეგ ბრძოლაში, ამერიკელ მედესანტეებთან ერთად, ქართველი სამხედროები ჩაერთნენ. მათ მტრის მიერ დაკავებული დასახლებული პუნქტის გათავისუფლება დაიწყეს.

სულ ღირსეულ პარტნიორობა 2015-ში 600 ქართველი და ამერიკელო სამხედრო მონაწილეობს. წვრთნებში მონაწილეობის მისაღებად, პირველად საქართველოში ევროპიდან შავი ზღვის გავლით ამერიკული სამხედრო ტექნიკა - 14 ბრედლის ტიპის ქვეითთა საბრძოლო მანქანა ჩამოვიდა. მანევრებში 300 ამერიკელი მედესანტე და ქვეითი მონაწილეობს.

სწავლება სამ ფაზას ითვალისწინებს - თეორიული მომზადება, საცეცხლე მომზადება და ტაქტიკური სწავლებები. ღირსეული პარტნიორი 25 მაისამდე გაგრძელდება.