შალვა თათუხაშვილის ოჯახის ადვოკატი ირაკლი ზაქარეიშვილი პროკურორის დადგენილებას, თათუხაშვილისთვის დაცვის ღონისძიების გამოყენების შესახებ, აქვეყნებს. ადვოკატის განცხადებით, დადგენილების სამოტივაციო ნაწილში კარგად ჩანს პროკურატურის მცდელობა დაეფარა ჩადენილი დანაშაულების კვალი.
"საქართველოს მთავარი პროკურატურა აცხადებს, რომ შალვა თათუხაშვილი პოლიციამ აღმოაჩინა ლილოში, რის შემდეგაც პოლიციის განყოფილების შენობიდან მიიყვანა თბილისის პროკურატურის შენობაში. ვასაჯაროებ პროკურორის დადგენილებას შალვა თათუხაშვილის დაცვის ღონისძიების გაუქმების შესახებ. დადგენილების სამოტივაციო ნაწილი, უდავოდ მიუთითებს ფაქტზე, რომ პროკურატურა ცდილობდა შ. თათუხაშვილისათვის თავისუფლების უკანონო აღკვეთისა და სხვა ჩადენილი დანაშაულების კვალის დაფარვას. პროკურატურისგან ვითხოვ რა დაცვის ღონისძიების განხორციელების შესახებ შალვა თათუხაშვილის წერილობითი თანხმობის გასაჯაროებას, უკომენტაროდ გთავაზობთ პროკურორის დადგენილებას დაცვის ღონისძიების გამოყენების გაუქმების შესახებ", - ნათქვამია განცხადებაში.
ზაქარეიშვილის გამოქვეყნებული დადგენილება 2014 წლის 28 თებერვლით არის დათარიღებული. ტაბულა მას უცვლელად გთავაზობთ.
"საქმის მასალებით ირკვევა, თათუხაშვილმა თავდაპირველად გამოხატა თანხმობა დაცვის სპეციალურ პროგრამაში ჩართვაზე. მოგვიანებით, მის მიმართ დაცვის სპეციალური ღონისძიების გამოყენების დროს, იგი გაიპარა საცხოვრებელი სახლიდან, შესაბამისად, თავი აარიდა ამ ღონისძიებაში მონაწილეობას, რითაც ფაქტობრივად გამოხატა საკუთარი ნება ხსენებული ღონისძიების გამოყენებასთან დაკავშირებით.
საქართველოს სისხლის სამართლის საპროცესო კოდექსის 70-ე მუხლის მე-5 ნაწილის თანახმად, დაცვის სპეციალური ღონისძიების საფუძვლის აღმოფხვრის შემთხვევაში, ამ ღონისძიებას აუქმებს მისი გამოყენების შესახებ გადაწყვეტილების მიმღები პირი, რაც დაუყოვნებლივ ეცნობება დასაცავ პირს.
დაცვის სპეციალური ღონისძიების გამოყენების საფუძველია, ერთის მხრივ ის საფრთხე, რომლის აღსაკვეთადაც გამოიყენება ხსენებული ღონისძიება, ხოლო მეორეს მხრივ, თავად დასაცავი პირის თანხმობა. ვინაიდან მოქმედი კანონმდებლობა არ ითვალისწინებს დაცვის სპეციალური ღონისძიების გამოყენების შესაძლებლობას დასაცავის პირის თანხმობის გარეშე, ხოლო თათუხაშვილმა ნებაყოფლობით აარიდა თავი ამ ღონისძიებაში მონაწილეობას, რაც წარმოადგენს მის უარს ხსენებული ღონისძიების გამოყენებაზე, შესაბამისად, აღარ არსებობს თათუხაშვილის მიმართ დაცვის სპეციალური ღონისძიების გამოყენების საფუძველი", - ნათქვამია დადგენილებაში, რომელსაც ხელს პროკურორი ამირან გელუაშვილი აწერს.
