სოფლის მეურნეობის სამინისტროს დაკავებულ მაღალჩინოსნებს ბრალი ოფიციალურად წარუდგინეს. ერთ-ერთი დაკავებულის, ბესიკ თეთვაძის ადვოკატის განცხადებით, მისი დაცვის ქვეშ მყოფს, ბრალი სისხლის სამართლის კოდექსის 182-ე მუხლით წარედგინა, რაც თანხების მითვისებასა და გაფლანგვას გულისხმობს.
ადვოკატ დავით ხაჟალიას ინფორმაციით, ამავე მუხლით წარედგინათ ბრალი სხვა დაკავებულებსაც, რამდენიმეს კი - სხვა მუხლებითაც.
"თეთვაძეს ბრალი 182-ე მუხლით წარედგინა, რომელიც მაქსიმალურ ზომად 11 წლამდე თავისუფლების აღკვეთას ითვალისწინებს. გამოძიების თანახმად, იგი დაეხმარა სხვა მუშა ჯგუფის წევრებთან ერთად შპს მექანიზატორის დირექტორს, რომ მიეთვისებინა და გაეფლანგა მილიონ ლარზე მეტი ოდენობის თანხა", - განაცხადა ხაჟალიამ.
დაკავებულები ბრალდებებს არ აღიარებენ და თავს დამნაშავედ არ ცნობენ.
შეგახსენებთ, 1-ელ მაისს, შსს-ს ანტიკორუფციული სააგენტოს თანამშრომლებმა, სოფლის მეურნეობის სამინისტროს შვიდი თანამშრომელი დააკავეს. აღნიშნულთან დაკავშირებით, სოფლის მეურნეობის მინისტრი, დავით კირვალიძე, თანამდებობიდან გადადგა.
სოფლის მეურნეობის სამინისტრო