პროკურორობის უფლება არ ექნებათ ქართული სასწავლებლების საჯარო ადმინისტრირების მაგისტრებსაც. იგივე უწყებები ტაბულას პასუხად მიუთითებენ მოთხოვნებზე, რომელიც წაეყენება პროკურორის თანამდებობაზე დასანიშნ პირს და განსაზღვრულია პროკურატურის შესახებ საქართველოს კანონით.
საქართველოს კანონმდებლობის მიხედვით, იმისათვის, რომ პროკურორი გახდეს, პირს მოეთხოვება ჰქოდეს უმაღლესი იურიდიული განათლება, ფლობდეს სამართალწარმოების ენას, გავლილი ჰქონდეს სტაჟირება პროკურატურის ორგანოებში (ან იურისტად მუშაობის სამწლიანი გამოცდილება) და ჩაბარებული ჰქონდეს საკვალიფიკაციო გამოცდა, მათ შორის, სისხლის სამართალში.
ეს საკითხები მას შემდეგ გახდა აქტუალური, რაც აღმოჩნდა, რომ საქართველოს იუსტიციის მინისტრს, თეა წულუკიანს, რომელიც ამავდროულად პროკურორიცაა, არ მიუღია უმაღლესი იურიდიული განათლება- არ აქვს დასრულებული იურიდიულის ბაკალავრიატი, მაგისტრატურა, ან სხვა. თეა წულუკიანი აცხადებს, რომ მან განათლება ფრანგულ სასწავლებელ ENA-ში მიიღო, სადაც მას საჯარო ადმინისტრირების მაგისტრის ხარისხი მიენიჭა (MPA).
საფრანგეთში სისხლის სამართლისა და ადმინისტრაციული სასამართლოები გამიჯნულია და თეა წულუკიანის ანალოგიური დიპლომის მქონე პირი, სისხლისამართლებრივ დევნას ვერ განახორციელებს. აღსანიშნავია, რომ საქართველოს იუსტიციის მინისტრმა გენერალი გიგი კალანდაძე პირადად დააკავა. ENA-ს კურსდამთავრებულებს ადმინისტრაციულ და საფინანსო დავებზე შეუძლიათ ადმინისტრაციულ სასამართლოში სახელმწიფო ინტერესების წარმოდგენა.
ტაბულამ იუსტიციის სამნისტროსა და მთავარ პროკურატურისგან საჯარო ინფორმაცია 6 და 11 მარტს გამოითხოვა.
