თბილისის საქალაქო სასამართლომ გიგი უგულავას საქმესთან დაკავშირებით განმარტება გააკეთა. განცხადების მიხედვით, პროკურატურამ ვერ დაასაბუთა გირაოს სახით 1 000 000 ლარის შეფარდების საფუძველი და სასამართლომ მიიჩნია, რომ არ არსებობდა უგულავას მიერ მიმალვის, ახალი დანაშაულის ჩადენის, პროცესის მონაწილეებზე ზემოქმედების და გამოძიებისთვის ხელის შეშლის საფრთხეები. შესაბამისად, უგულავას მიმართ არ იქნა გამოყენებული აღკვეთის ღონიძიების არცერთი სახე.
"სასამართლომ ზეპირი მოსმენის გარეშე განიხილა პროკურატურის შუამდგომლობა ბრალდებულ გიორგი უგულავას თანამდებობიდან გადაყენების თაობაზე. ვინაიდან, ბრალდების მხარის მიერ შუამდგომლობაში მითითებული თბილისის მერის თანამდებობიდან გადაყენების საფუძვლები იყო ზოგადი და დაუსაბუთებელი, სასამართლოს განჩინებით ბრალდების მხარეს უარი ეთქვა შუამდგომლობის დაკმაყოფილებაზე და გიორგი უგულავა არ იქნა გადაყენებული თანამდებობიდან", - ნათქვამია სასამართლოს განცხადებაში.
გიგი უგულავას საქმის სასამართლო განხილვისას დაშვებული იყო ფოტო და ვიდეოგადაღება. შემდეგი პროცესი საქმესთან დაკავშირებით 13 აპრილს გაიმართება.
შეგახსენებთ, თბილისის მერს, გიგი უგულავას, ფინანსთა სამინისტროს საგამოძიებო სამსახურმა ბრალი სხვისი ქონების მართლსაწინააღმდეგოდ მითვისებისა და უკანონო შემოსავლის ლეგალიზაციის მუხლებით წაუყენა.
