სასჯელაღსრულების, პრობაციისა და იურიდიული დახმარების მინისტრმა სოზარ სუბარმა ციხეებში შექმნილ სიტუაციაზე ისაუბრა. სუბარი არეულობებს ყოფილ ხელისუფლებას უკავშირებს. მისი თქმით, ყველა მსჯავრდებული, რომელიც კანონს დაარღვევს, მკაცრად დაისჯება.
,,დღეიდან გატარებული იქნება ყველა ნორმა, რაც კანონშია გაწერილი. უფრო კონკრეტულად, ორთაჭალის #1 დაწესებულებაში გუშინწინ მომხდარ ფაქტთან დაკავშირებით აღიძრა საქმე ექვსი მსჯავრდებულის მიმართ, რომლებმაც არეულობის მოწყობა სცადეს. ექვსივე მათგანი იქნება დასჯილი. რაც შეეხება ქსანში წუხელ მომხდარ ფაქტს, როცა შეურაცხყოფა მიაყენეს ჯარისკაცს და იყო დაწესებულების ტერიტორიაზე შეჭრის მცდელობა, მოკვლევა ამ საქმეზეც დავიწყეთ და მასალები შსს-ს გადაეცა. თავად პატიმრების მიმართ, რომლებიც ამ ინციდენტში ფიგურირებდნენ, ამ ეტაპზე არანაირი ღონისძიება არ იქნება გატარებული იქიდან გამომდინარე, რომ მათი მხრიდან რაიმე სერიოზული დარღვევა არ დაფიქსირებულა, თუმცა დღეიდან ნებისმიერი პატიმრის მიმართ, რომელიც არ დაემორჩილება კანონს, იქნება მკაცრი ზომები გატარებული, მათ შორის დაისჯება ყველა ის ადამიანიც, რომელიც იგივეს გამეორებას გარეთ ეცდება“, - განაცხადა სასჯელაღსრულების მინისტრმა.
რაც შეეხება ქსნის # 15 სასჯელაღსრულების დაწესებულებაში სპეცდანიშნულების რაზმის შეყვანას, სოზარ სუბარმა ეს ინფორმაცია უარყო.
,,მაშინ როცა გარეთ იყო ხმაური და ამტკიცებდნენ, რომ შიგნით სპეცრაზმია შესული და პატიმრებს სცემენ, სინამდვილეში იყო აბსოლუტური სიწყნარე. შიგნით არაფერი ხდება, თუმცა გარეთ ხდება ვითარების შეგნებული დაძაბვა“, - აღნიშნა სუბარმა.
შეგახსენებთ, ქსნის სასჯელაღსრულების მე-15 დაწესებულებაში თხუთმეტმა პატიმარმა პირი ამოიკერა. ისინი ითხოვენ, თანამდებობებს ჩამოშორდნენ ის პირები, რომლებიც მხილებულნი არიან პატიმრების წამებაში, ცემასა და ღირსების შემლახველ მოპყრობაში.
