ქუთაისში, პარლამენტის შენობის წინ, ტელეკომპანია ПИК-ის ჟურნალისტების აქცია გაიმართა. აქციის მონაწილეები არხის მაუწყებლობის შეჩერებისა და გამოყოფილი ფინანსების საკითხის გამოძიებას ითხოვდნენ.
პრემიერმინისტრობის კანდიდატი ბიძინა ივანიშვილი ჟურნალისტებს დაჰპირდა, რომ საკითხს გადახედავს.
აღნიშნული საკითხი საზოგადოებრივი მაუწყებლის სამეურვეო საბჭოშიც განიხილება.
შეგახსენებთ, ტელეკომპანია ПИК-ი ეთერში აღარ გადის. მაუწყებლობის შეწყვეტას წინ უძღოდა საზოგადოებრივი მაუწყებლის მხრიდან ПИК-თან საქმიანი კონტაქტების შეჩერება.
13 ოქტომბერს ტელეკომპანიის ჟურნალისტებმა პროტესტის ნიშნად ეთერში „მდუმარე“ საინფორმაციო გამოშვება გაუშვეს. ПИК-ის თანამშრომლები ამტკიცებდნენ, რომ ტელეკომპანიას მოულოდნელად ფინანსური პრობლემები შეექმნა, მისი სიგნალი კი თანამგზავრიდან გაითიშა. პასუხისმგებლობას ამ ვითარებაზე ჟურნალისტები საზოგადოებრივ მაუწყებელს აკისრებდნენ, რომელიც ПИК-ის დამკვეთს წარმოადგენს და განმარტებებს ისინი სწორედ საზოგადოებრივი მაუწყებლის ხელმძღვანელებისგან მოითხოვდნენ.
ამის საპასუხიდ, 16 ოქტომბერს საზოგადოებრივი მაუწყებლის გენერალურმა დირექტორმა ПИК-ის ხელმძღვანელობას წერილობით აცნობა, რომ აჩერებს ПИК-თან კონტრაქტის მოქმედებას ПИК-ის მხრიდან მისი დაღვევის მოტივით. კერძოდ, „მდუმარე“ საინფორმაციო გამოშვების ეთერში გაშვებისა და არხის თანამგზავრზე თვითნებურად ჩართვის გამო. ამ გადაწყვეტილების შემდეგ არხის მაუწყებლობა შეჩერდა.
საკითხს ახალგაზრდა იურისტთა ასოციაციაც გამოეხმაურა. საია-ს განცხადებაში ნათქვამია, რომ სახელმწიფო აუდიტის სამსახური საზოგადოებრივი მაუწყებლისა და ტელეკომპანია ПИК-ის მიერ სახელმწიფო ფინანსების ხარჯვის მიზანშეწონილობით უნდა დაინტერესდეს.
