გორის რაიონის სოფელ მერეთში გუშინდელი ინციდენტის დროს, რომელიც ქართული ოცნების ლიდერების, ბიძინა ივანიშვილისა და ირაკლი ალასანიას ჩასვლას მოჰყვა, დაკავებულ ოთხ პირს გორის რაიონულმა სასამართლომ 10-დღიანი ადმინისტრაციული პატიმრობა მიუსჯა.
გავრცელებული ცნობით, ოთხი დაკავებულიდან ორი - დავით ბზიშვილი და ალექსი კიკოლაშვილი ქართული ოცნების აქტივისტები არიან, ხოლო ლაშა ჭიღლაძე და ალექსანდრე ოდიშვილი - ნაციონალური მოძრაობის. ოთხივე მათგანს ბრალი ხულიგნობის მუხლით აქვს წაყენებული.
ტაბულა კოალიცია ქართული ოცნების პრესსამსახურს დაუკავშირდა, სადაც აღნიშნულთან დაკავშირებით კომენტარის გაკეთება არ ისურვეს.
სოფელ მერეთში ბიძინა ივანიშვილის გუშინდელ სტუმრობას შეხლა-შემოხლა მოჰყვა. დაშავდა რამდენიმე ადამიანი. როგორც ცნობილია, ფიზიკური დაპირისპირება მას შემდეგ დაიწყო, რაც ბიძინა ივანიშვილის მისამართით ნეგატიური შეძახილები გაისმა.
