რუსული ოპოზიციური ძალები მორიგი მსვლელობის გამართვას მოსკოვში, 12 ივნისს, რუსეთის დღეს კრემლის მიმართულებით გეგმავენ. ამის შესახებ განცხადება ”მემარცხე ფრონტის” ლიდერის, სერგეი უდალცოვის სოციალური ქსელის გვერდზეა განთავსებული.
BBC - ის ინფორმაციით, აქტივისტები მარშით ტვერსკის მოედნიდან ბოროვიცკის მოედნამდე გადაადგილდებიან.
”სამუშაო ჯგუფის შეხვედრა შედგა, სადაც გადაწყვეტილება იქნა მიღებული იმის შესახებ, რომ მსვლელობა და მიტინგი 12 ივნისს გაიმართება. აქციას 6 მაისს გამართული მარშის ორგანიზატორები აწყობენ.” - ნათქვამია განცხადებაში.
რუსი ოპოზიციონერი სერგეი უდალცოვი ამჟამად ადმინისტრაციულ სასჯელს იხდის ერთ-ერთ საპროტესტო აქციაზე პოლიციისადმი დაუმორჩილებლობის გამო.
6 მაისს გამართული ”მილიონიანი” მარში, რომელიც რუსეთის არჩეული პრეზიდენტის კრემლში დაბრუნების საწინააღმდეგოდ იყო მიმართული, აქციის მონაწილეების მასობრივი დაკავებებით დასრულდა.
