რეგულარული ჯერ წამოწოლილია, იზმორება, ხალიჩაზე ჩიფსების ნატეხებს ეძებს და გუნდებს აკვირდება. მალე დევიდ სტერნიც ჩამორეკავს. გუნდებში ბიზნესლანჩისთვის მოემზადებიან. დევიდ სტერნი NBA-ს კომისარი, ოფიციალური ბოსი და არაოფიციალური დამკვირვებელია. ბიზნესლანჩზე ლიგის კომისარმა ლიგის რეგულარულს დაუძახა. პირველი გაჩერება, ნიუ ჯერსი, ისტ რაზერფორდი.
ნეთსი პოტენციალს ყიდულობს, ნიჭს დოლარებით ეძებს. ცოტა ხელოვნურად აკეთებს ყველაფერს. გუნდის მფლობელი მიხაილ პროხოროვია და შარშან, ბოსმა დერონ უილიამსი დაკერა, ორი წლით აიყვანა და დერონს დაუტვიტერა, მალე ერთ კარგ ბიჭს გიყიდი, მშვიდად იყავიო. დერონი უცენტროდ თამაშობს. ნეთსის კარგი ბიჭი, მოქნილი ბრუქ ლოპეზი დალეწილია და მეხუთე ნომერზე ყველა მაღალი დგება. ყველა, ვინც ორ მეტრზე მაღალია და ცენტრზე დადგომის აზრზე არ არის.
უილიამსი სერიოზული პირველი ნომერია. ნეთსში ნორმალური სტატისტიკა (18.4+8.4 პასი) აქვს. ადრე უკეთესი იყო. სტატისტიკაც და უილიამსიც. იუტაში (პირველი სეზონი არ ითვლება, დერონი ჯერ მეჯიქის კონსპექტებზე იჯდა) უილიამსს ყველა სეზონში 9.3 და მეტი პასი ჰქონდა. თავისი ჩაჭრებით, სტაბილური გაქცევებით და სოლიდური დაცვით.
ნეთსში ამის გაკეთება რთულია. პასების რაოდენობის გასაზრდელად ნორმალური ტიპები გინდა. ვინც შენგან პასს მიიღებს და არ დაკომპლექსდება, არ ინერვიულებს. ნიუ ჯერსიში ძირითადად, ერთჯერადი ბიჭები დგანან. დერონისგან პასს იღებენ და ბურთს დერონს უბრუნებენ. უილიამსი საკუთარ თავს ეძებს, იბნევა, სასროლს ვეღარ ისვრის და სროლის პროცენტს იფუჭებს. ლოპეზის შემდეგ, ნეთსის ყველაზე კარგი მსმენელი კრის ჰამფრიზია (14.1+10.2 მოხსნა). ჰამფრიზი მეოთხე ნომერზე დგას, სროლების 53.6%-ს ათიანში უშვებს და თან, კიმ კარდაშიანის ქმარია.
დერონი ნიუ ჯერსიში 4.3 შეცდომას უშვებს. ძალიან ბევრია. უილიამსი ამ სეზონის მერე შეუზღუდავი უფლებების თავისუფალი აგენტი იქნება. თუ მიხაილ პროხოროვი დუაიტ ჰოვარდს ვერ წამოიყვანს, ან თუ ჰოვარდი მარტამდე ლეიკერსში გაიქცევა, ივლისამდე დერონიც უნდა გაცვალოს. მერე ვერ გაცვლის, თავისუფალი უილიამსი თავისუფლად აირჩევს უკეთეს გუნდს და ნეთსიც უდერონო, უჰოვარდო, ცუდი ბანდა იქნება.
იქვეა ნიქსის ოფისიც. რეგულარული მედისონ სკვერ გარდენის ბიზნესლანჩზეც მივა. სტერნს წამოცდა, ნიქსს მაგარი მზარეული ჰყავს, ნეკნებს ხოშიანად წვავსო. ნიქსიც ხოშიანი გუნდი უნდა იყოს და ვერ არის.
ტაისონ ჩენდლერისთვის (10.0+9.5 მოხსნა) ერთ სეზონში 14 750 000 დოლარის მიცემა არარენტაბელური, ცუდი კონტრაქტი იყო. ჩენდლერი ერთჯერადი ტიპია. ტრავმამდე ნორმალურად დგას სამწამიანში და ტერიტორიას იცავს. აგროვებს ათამდე ქულას და ერთი-ერთზე არ უნდა დატოვო, მაინც ვერ შეასრულებს. რეგულარულში ჩენდლერს სტატისტიკის გაუმჯობესებაში კარმელო ენტონი (25.0+6.7 მოხსნა+4.3 პასი) ეხმარება. ფლეი-ოფში ენტონი უკვე თავის თავზე ითამაშებს და გუნდმა ეს იცის. ფლეი-ოფში ჩენდლერი ხუთქულიანი ცენტრია, რომელსაც შარშან, დალასში გაუმართლა. იქ დირკ ნოვიცკი და ჯეისონ კიდი იღლებოდნენ და ტაისონი მოსახსნელს ხსნიდა. ნორმალურ დაცვაში ნიქსი ბევრ მილიონს იხდის. ამ კონტრაქტში ჩონსი ბილაფსის შენარჩუნება და იუტადან ერთი წლით ალ ჯეფერსონის წამოყვანა გაქაჩავდა. ბილაფსი გაუშვეს, ჯეფერსონს დიდი თავი დაუწუნეს და დარჩა ჩენდლერი. ნიქსიც ერთჯერადი გუნდია. ახალი სახელფასო ჭერით და აგრესიული საგადასახადო სისტემით, ნიქსი სამ მოთამაშეს (ჩენდლერი, ენტონი, სტაუდმაიერი) ერთ სეზონში თითქმის 52 მილიონს აძლევს.
ნიქსში 32 წლის ბაირონ დევისია და ჯერ ძუნძულებს, ზურგს ასვენებს. ბაირონს დისკოზი აქვს.
აღმოსავლეთი ფილადელფიის გარეშე ვერ დაიხურება. რეგულარული სიქსერზის ბაზაზეც მივა. ბაზა, რომელიც უფრო რამშტაინია, ვიდრე საკალათბურთო გუნდის სავარჯიშო ადგილი. ფილადელფიაში სამხედრო გაგებაა. დააგვიანებ, ზედმეტი ხარ, ანუ გუნდს აღალატებ. თუ საკუთარ სნაიპერს არ დაიცავ, სხვისი სნაიპერი დაგაგდებს, ანუ დასაგდები ხარ.
ფილადელფიამ სეზონი უსაინ ბოლტივით, ყველაზე სწრაფად და მურტალი დაცვით გახსნა. ფილადელფიაში თავისი დრო და ნდობა ყველას აქვს. ფილადელფიაში შვიდი კაცი (ელტონ ბრენდი 10.3, სპენსერ ჰოუზი 10.4, ივან ტერნერი 10.8, ტადეუს იანგი 12.4, ანდრე იგუოდალა 14.5, ჯრუ ჰოლიდეი 14.9 და ლუის უილიამსი 15.7) 10 ქულაზე მეტს იღებს და ბოსები კმაყოფილები არიან. გუნდი დაცვაში ყველაზე ბევრს, 34.6 მოხსნას აგროვებს. სოლიდურია. რეგულარული ბოსტონისკენ ცოტა დაღლილი და კმაყოფილი მიდის.
სელტიქსი ლიგის ელენთაა. თუ ამ ორგანოს ტრანსპლანტაციაც მოსულა და ლიგა ახალი ელენთით ძველებურად იმუშავებს, რეგულარული ერთ კარგ დონორს მონახავს. მანამდე სელტიქსის ამბები კიდევ ერთხელ გასავლელია.
გუნდის გენერალურმა მენეჯერმა, მისტერ დენი ეინჯმა ჟურნალისტებს თავის გოლფ კლუბში დაუძახა, ბევრი სენდვიჩი მიართვა და გუნდზე ეჭორავა. ეინჯი არ ცვლის რაჟონ რონდოს (15.0+9.4 პასი+5.1 მოხსნა+ბევრი ჩაჭრა და სელტიქსის დაცვა) და დანარჩენები იცვლებიან. დანარჩენებში კაპიტანი პოლ პირსი (კარიერაში, ბოსტონში თითქმის 22 000 ქულა), წითელი წიგნის წითელი მგელი კევინ გარნეტი და რეი ალენი არიან. ეინჯმა ჯერმეინ ო’ნილი კამპარიზე გაუშვა და ბრიფინგი ტკბილი მოგონებების სადღეგრძელოთი დახურა. რეგულარულს ცრემლი წამოუვიდა და თვალები რონდოს დედის ბენდენით შეიმშრალა.
ატლანტაში სხვა გაგებაა. სეზონის დაწყებამდე ყველა ბრექობს, სეზონის პროცესში ყველა უფრო ბრექობს და სეზონის ბოლო, გასავარდნ წუთებში ყველა გატრუნულია. ეს ატლანტაა. დომინიკ უილკინსი მაიკლ ჯორდანზე მაგრად ეკიდებოდა კალათზე და ფლეი-ოფში უილკინსს მაიკლზე მაგრად იკიდებდნენ. დღეს უილკინსი ჯოშ სმიტია, რომელიც ფლეი-ოფშიც ხმაურობს და ატლანტა მაინც ვერ იგებს. ერთი წრის გავლა იქ უკვე ფლეშია. ზაზა ფაჩულია რეგულარულში თამაშობს, ფლეი-ოფში ჩხუბობს და პროცესში, რესტორანს უვლის. უკეთ, ვიდრე ატლანტას სამწამიანს.
მაიამიშიც სხვა გაგებაა. ქუჩური, რეპის, დიდმკერდიანი გოგოების და ასტონ მარტინების გაგება. ლებრონი სნუპია, ბოში აის ქიუბი. უეიდი დონი, დოქტორ დრეა. უეიდი ისვენებს. დონი უნდა ისვენებდეს და როცა ბისის, ფლეი-ოფის ბოლო სერიის დრო მოვა, ისიც გარეპავს. მანამდე ჯეიმსმა უნდა შეასრულოს და თუ დაიღლება, ბოშს დაუძახებს.
ჰიტი აწყობილია და მაიკ მილერიც დაბრუნდა. მილერი ადრე ლიგის პირველი პირველწლიანი გახდა, მერე ორივე მუხლი გაექცა, ოთხი რთული ოპერაცია გაუკეთეს და დღეს მაიკი პერიმეტრის ბიჭი გახდა. ლებრონი შედის სამწამიანში და თუ იქ ბევრი ხელი დახვდა, ბურთი პერიმეტრზე, მილერთან ამოდის. მაიკმა პირველ ორ თამაშში სამიანების 87.5% ჩასვა. სტივ ნეში ამ პროცენტით საჯარიმოებს ისვრის.
ჯეიმსი შარშანდელზე (26.7+7.5 მოხსნა+7.0 პასი) სექსუალურ სტატისტიკას (29.9 +7.9 მოხსნა+7.6 პასი) ნაკლებ დროში (წელს 37.1, წინა წელს 38.4) იღებს და ყველა ბედნიერია. ჯეიმსმა სან ანტონიოს ერთ მეოთხედში 15 ქულა, 3 მოხსნა და 3 პასი გაუკეთა. ჯეიმსი ცუდი ბიჭია. ბოშიც წავა, თავისი 19.6 ქულით და 8.1 მოხსნით.
იქვე, ისთშია ბულზის და მეჯიქის ოფისები. ბულზმა შარშან ლებრონი ვერ მოაგვარა და დერიკ როუზი რეგულარულის MVP იყო. რეგულარული სხვა თემაა. რეგულარულში ატლანტაც გუნდია. ფლეი-ოფში როუზი დადგა, როუზზე ლებრონი მივიდა და დერიკი კუთხეში დააყენეს. თავისი 25 ქულით, ჯორდანის გამოხედვით და ლამაზი ოფლსაწმენდით. ლუოლ დენგი ჯეიმსს აეწება და ჯეიმსმა კაპიტანი დაღალა. ჩიკაგო რეგულარულში იცელქებს და ფლეი-ოფში ჰიტის რეპი უფრო პოპულარული იქნება. ორლანდოშიც იგივე სიტუაციაა. იქ დუაიტ ჰოვარდი მეოთხედ გახდება რეგულარულის საუკეთესო დამცველი, რაიან ანდერსონი რეჯი მილერზე ბევრ სამიანს ჩააგდებს და გუნდი აღმოსავლეთის ფინალამდე ვერ მივა. არც უნდა მივიდეს. ჰოვარდს პროხოროვი ან კობი ბრაიანტი ელოდებიან. დუაიტისთვის ორივე მაგარი ვარიანტია.
დასავლეთი სხვა თემაა. დასავლეთი უფრო შეიცვლება და რაღაც კანტები უკვე ჩანს.
ოკლაჰომა სტაბილურობასთან ძმაკაცობს და ოკლაჰომაში კევინ დიურანია. რასელ უესთბრუქით, ჯეიმს ჰარდენით. ოკლაჰომა ამ სეზონის დალასია.
დალასი ამ სეზონის ოკლაჰომაა, ცოტას სადღაც ვერ ქაჩავს და დირკ ნოვიცკიც დაიღალა. დირკს მუხლები ეტკინა. დირკმა 23 000 ქულა უკვე აიღო, შარშან ჩემპიონიც გახდა. Mission Possible შარშან იყო. წელს პირიქით, ცუდი, შეუსრულებელი მისია იქნება. დალასიც ჩემპიონი აღარ იქნება.
სან ანტონიოში ტიაგო სპლიტერს კლინტ ისტვუდის ძველ ფილმებს აყურებინებენ. კლინტი გასროლამდე თვალებს რომ ჭუტავს, თამბაქოს ღეჭავს და მერე ყველას აწვენს. სპლიტერში არის რაღაც ისტვუდური. უბრალოდ, ტიაგომ ეს ჯერ არ იცის. ტიმ დანკანი მალე წავა. და სპლიტერი მოვა. ცუდი ჩანაცვლებაა. დაახლოებით ის ვარიანტია, რეი ჩარლზი ნიკოლაი რასტორგუევმა რომ შეცვალოს.
ლეიკერსში ფილ ჯექსონის კონსპექტები მაიკ ბრაუნის საზეპიროებმა შეცვალა. ლეიკერსიც შეიცვალა. ცოტა არასტაბილურია და კობი ახალ სისტემას ეჩვევა. მალე ამ შეჩვევით დაიღლება და ბრაუნი სისტემას კობიზე გადააწყობს.
რეგულარული დაიღალა. უნდა მოწესრიგდეს. ფლეი-ოფამდე ფორმაში უნდა იყოს. კობისთან და ლებრონთან ერთად.