ირანული სამთავრობო მედიის, IRNA-ს ინფორმაციით, ირანის საგარეო საქმეთა მინისტრი, აბას არაღჩი რუსეთის ქალაქ სანქტ-პეტერბურგში ჩავიდა, სადაც რუსეთის პრეზიდენტ ვლადიმირ პუტინს შეხვდება.
მანამდე რუსულ მედიას კრემლის პრესსპიკერმა დაუდასტურა, რომ პუტინი და არაღჩი ერთმანეთს შეხვდებოდნენ. აშშ-სა და ირანს შორის ომის დასამთავრებლად მიმდინარე მოლაპარაკებების შესახებ დისკუსიაში მონაწილეობას მიიღებს რუსეთის საგარეო საქმეთა მინისტრი, სერგეი ლავროვიც.
სანქტ-პეტერბურგში ჩასვლამდე არაღჩიმ განაცხადა, რომ სანქტ-პეტერბურგში მისი მგზავრობა "კარგ შესაძლებლობას წარმოადგენს, რათა რუს კოლეგებს ომთან დაკავშირებით განვითარებული მოვლენები გავაცნოთ".
შაბათ-კვირას, რუსეთისკენ გამგზავრებამდე, ირანის საგარეო მინისტრი პაკისტანსა და ომანში შუამავლებს შეხვდა. მისი თქმით, პაკისტანში განიხილეს პირობები, რომლის ფარგლებშიც აშშ-ირანის მოლაპარაკებების გაგრძელებაა შესაძლებელი.
