აშშ-ს პრეზიდენტმა დონალდ ტრამპმა, ზედიზედ მეორედ, კიდევ ერთი წლით გაახანგრძლივა ეროვნული საგანგებო მდგომარეობა, რომლის ფარგლებშიც რუსეთთან დაკავშირებულ გემებს ამერიკულ პორტებში შესვლა ეკრძალებათ. ამის შესახებ თეთრი სახლის ცნობა 17 აპრილის ფედერალურ რეესტრში გამოქვეყნდა.
"რუსეთის ფედერაციის მთავრობის პოლიტიკა და ნაბიჯები კვლაც წარმოადგენს ეროვნულ საგანგებო მდგომარეობას აშშ-ს საერთაშორისო ურთიერთობების არევის ან არევის საფრთხის მიზეზის გამო." – წერია ტრამპის მიერ ხელმოწერილ დოკუმენტში.
აღნიშნული ბრძანება, რომელიც პრეზიდენტმა ჯო ბაიდენმა 2022 წლის 21 აპრილს გამოსცა, რუსეთის დროშის ქვეშ მცურავ ან რუსეთის ფედერაციასთან დაკავშირებულ გემებს აშშ-ს პორტებში შესვლას უკრძალავს.
"დამატებით ერთი წლით ვახანგრძლივებ საგანგებო მდგომარეობის რეჟიმს რუსეთის ფედერაციის მიმართ და საგანგებო უფლებამოსილებებს, რომლებიც განსაზღვრულია №10371 პროკლამაციაში და ეხება რუსეთთან დაკავშირებული გემების გაჩერებისა და გადაადგილების რეგულირებას აშშ-ს პორტებში". – ვკითხულობთ აშშ-ს ფედერალურ რეესტრში გამოქვეყნებულ განცხადებაში.
მანამდე, თებერვალში და მარტის ბოლოს, პრეზიდენტმა ტრამპმა ასევე ერთი წლით გაახანგრძლივა ბაიდენის მიერ რუსეთისგან მომდინარე საფრთხეებთან დაკავშირებით გამოცხადებული ეროვნული საგანგებო მდგომარეობა და რუსეთის წინააღმდეგ 2014 წლიდან ამოქმედებული და 2022 წლიდან გაფართოებული სანქციებიც.
- ტრამპმა რუსულ საფრთხეებზე ბაიდენის მიერ გამოცხადებული საგანგებო მდგომარეობა გაახანგრძლივა
- ტრამპმა რუსეთს სანქციები კიდევ ერთი წლით გაუხანგრძლივა
პარალელურად, Politico-ს ინფორმაციით, მიმდინარე კვირაში კვლავ ამოქმედდა რუსულ ნავთობზე დაწესებული ამერიკული სანქციები, მას შემდეგ, რაც ტრამპის ადმინისტრაციამ შაბათ-კვირას არ გაახანგრძლივა რუსულ ნავთობზე ერთი თვის წინ შემოღებული 30-დღიანი საშეღავათო პერიოდი, რომელიც აშშ-მ ირანში ომით გამოწვეული ნავთობის მარაგების დეფიციტის გამო შემოიღო.
თებერვლის დასაწყისში რუსეთის საგარეო საქმეთა მინისტრმა, სერგეი ლავროვმა უკმაყოფილება გამოთქვა ტრამპის საგარეო პოლიტიკასთან დაკავშირებით. ლავროვის ჩიოდა, რომ ბაიდენის ადმინისტრაციის ნაბიჯების გაუქმების ნაცვლად ტრამპმა რუსეთის წინააღმდეგ ახალი ზომები მიიღო.
