ადვოკატმა მარიკა არევაძემ რეჟიმის პატიმარი, ნინო დათაშვილი მოინახულა. ის ამბობს, რომ ჯანმრთელობის მდგომარეობის გამო, დათაშვილი ციხის სპეციალურ პალატაში გადაიყვანეს, თუმცა, მისივე განცხადებით, ეს საკმარისი არაა, რადგან დათაშვილს სამოქალაქო კლინიკაში მკურნალობა ესაჭიროება.
"ნინოს ჯანმრთელობის მდგომარეობა ციხის პირობებში უკვე მეორედ დამძიმდა. უჭირს დამოუკიდებლად გადაადგილება, საერთოდ მოძრაობა [...] ის ციხის შედარებით ადაპტირებულ პალატაში გადაიყვანეს, სადაც ისეთი საწოლის გამოყენებაა შესაძლებელი, რომელიც ნინოს ჯანმრთელობის მდგომარეობის მოცემულობასთან უფრო მეტად მორგებულია, თუმცა, ეს საკმარისი არაა [...]
ოპერაცია საჭიროებს ძალიან რთულ ჩარევას და შემდეგ კიდევ უფრო მეტად მძიმე რეაბილიტაციის პერიოდს, რაც აუცილებელია, რომ მხოლოდ და მხოლოდ სახლის პირობებში მოხდეს. ციხის პირობებში მისი გამოჯანმრთელება ფაქტობრივად შეუძლებელია [...] რაც შეიძლება მალე უნდა დასრულდეს ადამიანის წამება და ეს აბსურდული წინასწარი პატიმრობა შეიცვალოს, რომ ნინომ შეძლოს მკურნალობა კლინიკის და რეაბილიტაცია სახლის პირობებში". - ამბობს ადვოკატი.
ცნობისთვის, ჯანმრთელობის მდგომარეობის გაუარესების გამო, ნინო დათაშვილმა მის ბოლო 2 სასამართლო პროცესზე დასწრება ვერ შეძლო.
ნინო დათაშვილი 20 ივნისს სამსახურებრივი მოვალეობის შესრულების დროს, სასამართლოს მანდატურზე განხორციელებული თავდასხმის ბრალდებით დააკავეს. სისხლის სამართლის კოდექსის შესაბამისი მუხლი 4-დან 7 წლამდე ვადით თავისუფლების აღკვეთას ითვალისწინებს.
დათაშვილს აღკვეთის ღონისძიების სახით პატიმრობა აქვს შეფარდებული.
