კოალიცია ძლიერი საქართველოს ადვოკატი, თორნიკე ართქმელაძე და მათი ოფისის მენეჯერი, ეკა გიორგობიანი პროკურატურაში გამოკითხვაზე დაიბარეს. ამის შესახებ კოალიციის გენერალურმა მდივანმა, ირაკლი კუპრაძემ და თავად თორნიკე ართქმელაძემ განაცხადეს.
"მამუკა ხაზარაძისა და ბადრი ჯაფარიძის შემდეგ, დღეს უკვე საქართველოს პროკურატურამ გამოკითხვაზე ჩვენი კოალიციის იურისტი, თორნიკე ართქმელაძე და ოფისის მენეჯერი, ეკა გიორგობიანი დაიბარა [...] პირდაპირ ვამბობთ, რომ პროკურატურაში მისვლას არ ვაპირებთ, მაგრამ, მზად ვართ, ნებისმიერ დროს, მაგისტრანტი მოსამართლის წინაშე, სასამართლოს დარბაზში გამოვცხადდეთ". - თქვა კუპრაძემ.
დაბარების შესახებ ისაუბრა თავად კოალიციის ადვოკატმაც.
"პროკურატურაში მისვლას არ ვაპირებ. თუმცა, თუ ისინი გადაწყვეტენ, რომ სასამართლოში დამიბარონ, იქ გამოვცხადდები. მთელი ის ინფორმაცია, რასთან დაკავშირებითაც ჩემი გამოკითხვა სურთ, მე ჩემი საადვოკატო საქმიანობის განხორციელების დროს მივიღე. ასეთ საკითხზე ჩემ დაკითხვას მათ კანონი პირდაპირ უკრძალავს". - ამბობს ართქმელაძე.
27 მარტს კოალიცია ძლიერი საქართველოს ლიდერი, მამუკა ხაზარაძე თბილისის საქალაქო სასამართლოში, მაგისტრი მოქალაქის წინაშე გამოკითხეს. მას პროკურატურიდან 26 მარტს დაუკავშირდნენ და გამოკითხვაზე დაიბარეს. ხაზარაძემ პროკურატურაში მისვლაზე უარი განაცხადა და თქვა, რომ მზად იყო, მაგისტრ მოსამართლესთან ნებისმიერ დროს გამოკითხულიყო.
წინა ხელისუფლების საქმიანობის შემსწავლელ საგამოძიებო კომისიაზე გამოუცხადებლობის გამო, პროკურატურამ მამუკა ხაზარაძის წინააღმდეგ გამოძიება დაიწყო.
კომისიამ 25 მარტს ჩატარებულ სხდომაზე შპს მაგნატის და მისი მესაკუთრის, ჯემალ ლეონიძის საქმე განიხილა. ამ სხდომაზე დაბარებულები იყვნენ კოალიცია ძლიერი საქართველოს ლიდერები, მამუკა ხაზარაძე და ბადრი ჯაფარიძე - მათ კომისიაზე მისვლაზე უარი განაცხადეს.
ბადრი ჯაფარიძეს 25 მარტის 16:00 საათამდე ჰქონდა დრო, რომ კომისიის სამდივნოსთვის ეცნობებინა გადაწყვეტილების შესახებ. კომისიამ ჯაფარიძის გამოუცხადებლობის გამო, პროკურატურისთვის მიმართვაზე 26 მარტს იმსჯელა. წულუკიანის განცხადებით, ჯაფარიძის საქმეც პროკურატურას გადაეცემა.
