ორგანიზაცია საერთაშორისო გამჭვირვალობა - საქართველოს მკვლევრის, გოჩა მჟავანაძის ცნობით, ვივამედის დირექტორი აქციების დროს დაკავებულ ბათუმელ მედროშეს, თემურ ქათამაძეს ფიზიკური შეურაცხყოფის მიყენების ფაქტზე ედავება.
მჟავანაძის ინფორმაციით, 24 მარტს, 14:00 საათზე თბილისის საქალაქო სასამართლოში აღნიშნულთან დაკავშირებით სასამართლო პროცესია ჩანიშნული.
"როგორც ჩვენი მედროშის მიერ გამოგზავნილი წერილიდან და მისი მეგობრის მიერ მოწოდებული ინფორმაციიდან ირკვევა, თემურ ქათამაძეს, კლინიკა ვივამედის დირექტორი ნინო ნადირაძე ედავება ფიზიკური შეურაცხყოფის მიყენებას, რაზეც დღეს, 14:00 საათზე, თბილისის საქალაქო სასამართლოში ადმინისტრაციული საქმისწარმოების ფარგლებში გაიმართება სასამართლო პროცესი.
ასევე, თემურ ქათამაძე გამოთქვამს უკმაყოფილებას არასათანადო მკურნალობის და უყურადღებობის გამო.
თავისუფლება ბათუმელ მედროშეს!
თავისუფლება სინდისის პატიმრებს!
ცეცხლი ოლიგარქიას!" - წერს მჟავანაძე.
ცნობისთვის, 18 მარტს თბილისის საქალაქო სასამართლომ ბათუმის აქციების მედროშის, თემურ ქათამაძის მოთხოვნა მისთვის საერთაშორისო დაცვის მინიჭების თაობაზე არ დააკმაყოფილა, რაც ლტოლვილის სტატუსს, ასევე ჰუმანიტარული ან დამატებითი დაცვის სტატუსს გულისხმობს.
სხდომაზე, ქათამაძემ სასამართლოს პროცესის გადადების შუამდგომლობით მიმართა. მედროშის განცხადებით, ის ფსიქოლოგიურ ზეწოლას განიცდიდა როგორც მიგრაციის დეპარტამენტის დროებითი მოთავსების ცენტრში, ასევე კლინიკა ვივამედში.
ქათამაძემ სასამართლოს მტკიცებულებების შესაგროვებლად დრო სთხოვა. მოსამართლე დიანა ფარქოსაძემ ქათამაძის შუამდგომლობა არ დააკმაყოფილა. ფარქოსაძის განმარტებით, შუამდგომლობა დასაბუთებული არ იყო.
თემურ ქათამაძე კლინიკა ვივამედში 5 მარტს, შიმშილობის 48-ე დღეს გადაიყვანეს. იმავე დღეს ზურაბ ჩხაიძემ განაცხადა, რომ ექიმებთან კონსულტაციის დღეს ქათამაძემ შიმშილობა შეწყვიტა.
-
ქათამაძე: დაკავების დღიდან ჩემს მიმართ ხორციელდება მუდმივი ფსიქოლოგიური ზეწოლა
-
ქათამაძე: ჩემი ბრძოლის ფორმა შიმშილობაა, სამშობლოსთვის ბრძოლის შეწყვეტა აღარ შემომთავაზოთ
ბათუმის საპროტესტო აქციების მედროშე პოლიციამ ორჯერ დააკავა. პირველად 11 იანვარს ბათუმის პოლიციის სამმართველოსთან აქციაზე, ხოლო მეორედ 17 იანვარს, იზოლატორიდან გამოსვლის დღეს, რის შემდეგაც ქათამაძემ შიმშილობა დაიწყო.
ქათამაძის მიერ ბათუმელებისთვის ემიგრაციის დეპარტამენტის დროებითი მოთავსების იზოლატორიდან გამოგზავნილ წერილში რეჟიმის პატიმარი წერდა, რომ დაკავებისას მასზე ფიზიკურად იძალადა ირაკლი დგებუაძემ და 10-მა პოლიციელმა.
26 თებერვალს ახალგაზრდა იურისტთა ასოციაციამ შსს-ს მიმართა და მოუწოდა, ბათუმში, საპროტესტო აქციებზე დაკავებული მედროშის, თემურ ქათამაძის დროებითი განთავსების ცენტრში მოთავსების ნაცვლად გამოყენებული ყოფილიყო ალტერნატიული ზომები, როგორიცაა პოლიციაში რეგულარული გამოცხადება, თავდებობა ან გირაო.
