რუმინეთი უკრაინას Patriot-ის ტიპის საჰაერო თავდაცვის სისტემას გადასცემს. შესაბამის განკარგულებას ხელი რუმინეთის პრეზიდენტმა, კლაუს იოჰანისმა 5 სექტემბერს მოაწერა.
რუმინეთის პარლამენტი სისტემის მიწოდების შესახებ შესაბამის ბრძანებას მომდევნო ხანებში გასცემს.
"მადლობა Patriot-ისთვის!" - მიმართავს უკრაინის პრეზიდენტის ადმინისტრაციის ხელმძღვანელი, ანდრიი იერმაკი რუმინეთის მთავრობას Telegram-ზე.
Patriot-ის სისტემები რუსეთ-უკრაინის 2022 წლის ომში უკრაინის საჰაერო თავდაცვის მხრივ მნიშვნელოვან როლს ასრულებენ. მათ შეუძლიათ ისეთი ბალისტიკური რაკეტების ჩამოგდებაც კი, როგორიც Kizhal-ის ტიპის რაკეტებია.
უკრაინამ ომის განმავლობაში Patriot-ის, სულ მცირე, სამი სისტემა მიიღო გერმანიისაგან და ერთი აშშ-სგან. სხვა ქვეყნებმა, მათ შორის, ნიდერლანდებმა და ესპანეთმა უკრაინას სისტემისთვის ინდივიდუალური გამშვებები და რაკეტები მიაწოდეს.
ივნისში აშშ-სა და ნიდერლანდების ლიდერებმა ასევე განაცხადეს, რომ უკრაინისთვის Patriot-ის ტიპის კიდევ ერთი სისტემის მიწოდებას გეგმავენ.
