კირბალიდან გატაცებული მოქალაქის ცენტრალური ხელისუფლების კონტროლირებად ტერიტორიაზე დასაბრუნებლად ე.წ სამხრეთ ოსეთის მარიონეტულ რეჟიმთან მოლაპარაკებები მიმდინარეობს. ამის შესახებ შიდა ქართლის სამხარეო პოლიციის უფროსმა, ვალერი თელიამ ისაუბრა.
"დაწყებულია გამოძიება, ინფორმირებულია სუს-ის ანალიტიკური დეპარტამენტის მიერ ყველა შესაბამისი ორგანო. როგორც ხედავთ, ჩვენც გამოძიების ფარგლებში, მაქსიმუმს ვაკეთებთ იმისთვის, რომ მაქსიმალურად უზრუნველვყოთ მოქალაქეების უსაფრთხოება და ასევე მაქსიმალურად შემჭიდროვებულ ვადებში მოხდეს გატაცებული მოქალაქის დაბრუნება" - თქვა ვალერი თელიამ.
კირბალის ტაძრის მიმდებარე ტერიტორიაზე გაჩერებულია თამაზ გინტურის კუთვნილი ავტომობილი. რატომ არ ხდება მანქანის გადმოყვანა - ამ შეკითხვაზე შსს-ის წარმომადგენელმა უპასუხა:
"როგორც მოგეხსენებათ, აღნიშნული ტერიტორია არის ოკუპირებული, და ტერიტორიაზე ჩვენ ფიზიკურად ვერ გადავდივართ. სამართალდამცველები და სუს-ის ანალიტიკური დეპარტამენტი აწარმოებს მოლაპარაკებებს ოსურ მხარესთან".
სახელმწიფო უსაფრთხოების სამსახურის ცნობით, 6 ნოემბერს გორის მუნიციპალიტეტის სოფელ კირბალის მიმდებარედ რუსულმა საოკუპაციო ძალებმა საქართველოს 1 მოქალაქე მოკლეს, 1 კი დააკავეს.