საფრანგეთის პრეზიდენტი ემანუელ მაკრონი ისრაელს 24 ოქტომბერს ეწვევა და თელ-ავივში ისრაელის პრემიერმინისტრს ბენიამინ ნეთანიაჰუს შეხვდება. ინფორმაციას მაკრონის ოფიციალური ვიზიტის შესახებ საფრანგეთის პრეზიდენტის ოფისი ავრცელებს.
ისრაელის ცნობით, 7 ოქტომბერს ჰამასის ტერორისტების თავდასხმისას გარდაცვლილებს შორის 30 საფრანგეთის მოქალაქეა. გავრცელებული ინფორმაციით, ამჟამად დაკარგულად და სავარაუდოდ გატაცებულად ითვლება საფრანგეთის 7 მოქალაქე, თუმცა ჯერჯერობით ინფორმაცია ტყვეების ვინაობის და მოქალაქეობის შესახებ დადასტურებული არ არის. მხოლოდ ერთი ქალის ტყვეობაში ყოფნაა დადასტურებული ჰამასის მიერ, რომელსაც საფრანგეთის მოქალაქეობა აქვს.
ბენიამინ ნეთანიაჰუს ისრაელში უკვე შეხვდნენ აშშ-ს, გერმანიის, დიდი ბრიტანეთის და იტალიის პირველი პირები. 22 ოქტომბერს აშშ-ს პრეზიდენტს ჯო ბაიდენს ისრაელი-ჰამასის ომის შესახებ სატელეფონო საუბარი ჰქონდა ემანუელ მაკრონთან და კანადის პრემიერმინისტრთან ჯასტინ ტრუდოსთან.
