უკრაინის პრეზიდენტს, ვოლოდიმირ ზელენსკის ევროვიზიის კონკურსზე ვიდეო მიმართვაზე უარი უთხრეს. ორგანიზატორების განმარტებით, ზელენსკის გამოსვლა კონკურსს პოლიტიკურს გახდიდა.
ბრიტანული გამოცემა Telegraph-ის ცნობით, ზელენსკის სურდა, მრავალმილიონიანი აუდიტორიისთვის მიემართა და მათთვის რუსული აგრესიის წინააღმდეგ ბრძოლაში უკრაინის მხარდაჭერისკენ მოეწოდებინა, თუმცა, ევროპის მაუწყებელთა საბჭომ (EBU), რომელიც BBC-სთან ერთად, ამ წლის ევროვიზიის ორგანიზატორია, პრეზიდენტს თხოვნაზე უარი უთხრა.
"ევროვიზიის სიმღერის კონკურსი საერთაშორისო გასართობი შოუა, რომელიც მკაცრი წესებითა და რეგულაციებით იმართება. აღნიშნული წესები არსებობს მისი შექმნის დღიდან. კონკურსის ერთ-ერთი ქვაკუთხედი მისი აპოლიტიკურობაა - ეს პრინციპი, კონკურსის ფარგლებში, პოლიტიკურ განცხადებებს კრძალავს". - აღნიშნავს EBU-ს პრესსპიკერი.
ევროვიზიის რიგით 67-ე კონკურსში ლივერპულში 13 მაისს დასრულდება. წლევანდელი ევროვიზია უკრაინაში უნდა გამართულიყო, თუმცა ომის გამო მასპინძლობა დიდმა ბრიტანეთმა ითავა.