უკრაინის საგარეო საქმეთა მინისტრის, დმიტრო კულებას თქმით, უკრაინა დასავლურ საბრძოლო თვითმფრინავებს რუსეთის ტერიტორიაზე იერიშის მისატანად არ გამოიყენებს. ამის შესახებ მან Sky News-სთან ინტერვიუში ისაუბრა.
"ჩვენ ვიყენებთ იარაღს, რომელსაც პარტნიორებისგან ვიღებთ, რათა რუსეთს უკრაინის ოკუპირებულ ტერიტორიებზე დარტყმა მივაყენოთ". - თქვა კულებამ.
კითხვაზე, შეუძლია თუ არა გარანტიის მიცემა, რომ უკრაინა დასავლურ თვითმფრინავებს და სხვა შორ მანძილზე მოქმედების იარაღებს რუსეთის ტერიტორიაზე იერიშის მისატანად არ გამოიყენებს, უკრაინის საგარეო საქმეთა მინისტრმა უპასუხა: "ჩვენ შეგვიძლია, გავცეთ გარანტია, რომ დასავლურ იარაღს უკრაინის ტერიტორიების გასათავისუფლებლად გამოვიყენებთ".
აღსანიშნავია, რომ დასავლეთის ქვეყნებს არ სურთ უკრაინისთვის ავიაგამანადგურებლების მიწოდება, რადგან მათი აზრით, ეს გამოიწვევს უკრაინის საზღვრებს მიღმა კონფლიქტის გაღრმავებას.
