პეკინის, შანხაისა და ვუჰანის მოსახლეობა ორშაბათიდან რეგულარულ საქმიანობას უბრუნდება, რაც ეკონომიკის გაძლიერების პერსპექტივას ზრდის.
დეკემბრის დასაწყისიდან ჩინეთში COVID-19-ით ინფიცირებულთა რიცხვი საგრძნობლად გაიზარდა და მიუხედავად იმისა, რომ ბევრი ადამიანი უკვე გამოჯანმრთელდა, კოვიდაფეთქებამ საერთაშორისო შეშფოთება გამოიწვია და ზოგიერთმა ქვეყანამ ჩინეთიდან ჩამოსულ მგზავრებზე შეზღუდვები დააწესა.
აშშ-ს სახელმწიფო დეპარტამენტის პრესსპიკერის, ნედ პრაისის განმარტებით, ჩინეთის ეკონომიკის სიდიდის გათვალისწინებით, COVID-19-ით ინფიცირებულთა მზარდი რიცხვი ჩინეთში შემაშფოთებელია მსოფლიოსთვის. მისი თქმით, აშშ იმედოვნებს, რომ ჩინეთი გაუმკლავდება ამჟამინდელ კოვიდტალღას.
19 დეკემბერს ჩინეთმა კორონავირუსით გარდაცვლილთა შესახებ ინფორმაცია პირველად გაავრცელა. პანდემიის დაწყებიდან ჩინეთს COVID-19-თან დაკავშირებული მხოლოდ 5 237 გარდაცვალების შემთხვევა აქვს აღრიცხული, ქვეყანაში კი 1.4 მილიარდი ადამიანი ცხოვრობს. ექსპერტები სიტუაციის გაუარესებას ვარაუდობენ - მკაცრი შეზღუდვების ფონზე ქვეყნის მოსახლეობას COVID-19-ის წინააღმდეგ გამომუშავებული ბუნებრივი იმუნიტეტი არ აქვს. ამასთან ერთად, ასაკოვანი მოსახლეობის დიდი ნაწილი ვაქცინირებული არ არის.