უკრაინის პრეზიდენტმა, ვოლოდიმირ ზელენსკიმ განაცხადა, რომ პარლამენტს თავდაცვის მინისტრის თანამდებობაზე ევჰენიი ხმარას კანდიდატურას წარუდგენს. ამჟამად ხმარა, რომელიც უკრაინის უსაფრთხოების სამსახურის (СБУ) ხელმძღვანელის მოვალეობის შემსრულებელია, პრეზიდენტის დავალებით რადას მიერ დანიშნვამდე უკრაინის თავდაცვის მინისტრის მოვალეობას შეასრულებს.
"ევჰენიი ხმარას დავავალე მინისტრის მოვალეობის შესრულება, თავდაცვის სფეროს რეფორმების გაგრძელება და იმ შედეგების უზრუნველყოფა, რომლებზეც ვისაუბრეთ.
მას შემდეგ, რაც ყველა აუცილებელი სამართლებრივი პროცედურა დასრულდება, პარლამენტს მივმართავ თხოვნით, მხარი დაუჭიროს ევჰენ ხმარას კანდიდატურას უკრაინის თავდაცვის მინისტრის თანამდებობაზე" - დაწერა ზელენსკიმ სოციალურ ქსელში.
ზელენსკიმ განაცხადა, რომ ხმარასთან შეხვედრა გამართა და აღნიშნა, რომ მათ აქვთ "სტრატეგიული ხედვა, თუ როგორ უნდა იმოქმედოს უკრაინამ აქტიურად მომავალშიც, რათა დაიცვას თავისი დამოუკიდებლობა და აიძულოს რუსეთი დიპლომატიურ გზას დაუბრუნდეს".
პრეზიდენტის თქმით, ხმარამ მნიშვნელოვანი გამოცდილება დააგროვა მაღალი ტექნოლოგიების გამოყენებით დარტყმითი ოპერაციების განხორციელებაში.
"სწორედ ამ მიმართულებაზე უნდა იყოს კონცენტრირებული ჩვენი თავდაცვა ამ ომში" - აღნიშნა ზელენსკიმ.
"ვფიქრობ, არსებულ პირობებში შორ მანძილზე მოქმედების რეალური შესაძლებლობები, უსაფრთხოების უზრუნველყოფის ეფექტიანი მუშაობა, რომელიც თავდაცვის ძალების ქვედანაყოფებში შიდა ვითარების კონტროლს უზრუნველყოფს, და ადამიანების მართვის პრაქტიკული გამოცდილება, რომელიც მას СБУ-ს სპეციალური ოპერაციების ცენტრ ალფას ხელმძღვანელობისას დაუგროვდა, უკრაინის თავდაცვის მინისტრის პოსტზეც მნიშვნელოვან უპირატესობას წარმოადგენს" - დაწერა მან.
ზელენსკის განცხადებაში არ უხსენებია არც იგორ კლიმენკო, რომლის თავდაცვის მინისტრად დანიშვნაც მედიაში განიხილებოდა, და არც მიხაილო ფედოროვი, რომლის დაბრუნებასაც საზოგადოების ნაწილი მოითხოვდა.
უკრაინის უმაღლესი რადის შემდეგი პლენარული სხდომა 18 აგვისტოს უნდა გაიმართოს.
