ბრიტანეთის სამხედრო დაზვერვის ცნობით, რუსეთის ძალებმა ბოლო 24 საათში მნიშვნელოვან წარმატებას ვერ მიაღწიეს, რადგან უკრაინული ჯარები მათ წინსვლას კონტრშეტევებისა და წინააღმდეგობების ფონზე აფერხებენ.
ბრიტანეთის სამხედრო დაზვერვა ყოველდღიურ ანგარიშში წერს, რომ რუსეთის საჰაერო და საზღვაო ძალებმა უკრაინის ჯარების ეფექტიანობის გამო კონტროლის დამყარება ვერცერთ რეგიონში ვერ შეძლეს, რაც მათ ქმედითუნარიანობის შემცირებაზე მეტყველებს.
მიუხედავად მარიუპოლის დაცემისა, უკრაინაში მძიმე ბრძოლები გრძელდება, რაც რუსეთს დონბასში სასურველ შედეგამდე მისვლის გეგმას კიდევ უფრო ურთულებს. ამის შესახებ ინფორმაციას ბრიტანეთის სამხედრო დაზვერვა ავრცელებს.
რუსი ოკუპანტები უკრაინაში მშვიდობიან მოქალაქეებს ხოცავენ - მას შემდეგ, რაც უკრაინელებმა ბუჩა დაიბრუნეს, ოკუპანტებისგან გათავისუფლებულ სოფელში 300-ზე მეტი მშვიდობიანი მოქალაქე მოკლული იპოვეს. რუსეთის თავდაცვის სამინისტრო ბრალდებებს უარყოფს და ამ ყველაფერს უკრაინის "უკანასკნელ პროვოკაციას" უწოდებს.
რუსეთმა უკრაინაზე სრულმასშტაბიანი თავდასხმა 24 თებერვალს გამთენიისას, ერთდროულად რამდენიმე დიდი ქალაქის, მათ შორის, კიევის დაბომბვით დაიწყო.
პუტინის მიერ უკრაინისთვის ომის გამოცხადებას წინ უძღოდა დონეცკისა და ლუგანსკის თვითგამოცხადებული რესპუბლიკების მარიონეტული რეჟიმების ფორმალური თხოვნა კრემლისადმი, დახმარებოდნენ "უკრაინული აგრესიის" მოგერიებაში.
უკრაინაში შეჭრის პარალელურად, მსოფლიოს წამყვანი ქვეყნები რუსეთს სხვადასხვა სახის სანქციას უწესებენ.
