აშშ-ს პრეზიდენტმა, ჯო ბაიდენმა ევროპაში აშშ-ს სამხედრო ნაწილების რაოდენობის გაზრდის ოფიციალური განკარგულება გასცა. მოსალოდნელია, რომ აშშ დამატებით სამხედრო ძალებს ევროპაში მიმდინარე კვირაში გაგზავნის.
აშშ-დან პოლონეთსა და გერმანიაში 2 000 სამხედრო ჩავა, ხოლო ამჟამად გერმანიაში მყოფი 1 000 ამერიკელი სამხედრო რუმინეთში გაიგზავნება.
24 იანვრის შემდეგ აშშ-ში 8 500 სამხედრო მაღალი მზადყოფნის რეჟიმშია. აშშ-ს თავდაცვის დეპარტამენტის მიხედვით, ჯერჯერობით მაშინ ევროპაში გადაყვანა არ იგეგმება, თუმცა ისინი დარჩებიან მაღალი მზადყოფნის რეჟიმში, რათა საჭიროების შემთხვევაში NATO-ს რეაგირების ძალებს მხარდაჭერა აღმოუჩინონ.
აშშ-ს ოფიციალური წარმომადგენლების თქმით, ევროპაში დამატებითი სამხედრო ძალების განლაგება ემსახურება NATO-ს მოკავშირეების მხარდაჭერის ჩვენებას, რომლებიც რუსეთის მხრიდან უკრაინის საწინააღმდეგო ქმედებების ფონზე საფრთხეს გრძნობენ.
ცნობები იმის შესახებ, რომ ბაიდენი ევროპაში დამატებით ამერიკელი სამხედროების გაგზავნას განიხილავს გასულ კვირას გავრცელდა.
უკრაინასა და რუსეთს შორის დაძაბული მდგომარეობის ფონზე გავრცელდა ინფორმაცია, რომ რუსეთი შეჭრის წინაპირობის შესაქმნელად აღმოსავლეთ უკრაინაში ოპერაციას ამზადებს. CNN-ის ცნობით, მათი წყაროს თქმით, ბაიდენის ადმინისტრაციაში სჯერათ, რომ რუსეთი, შესაძლოა, უკრაინაში შეჭრისთვის ემზადებოდეს, "რაც გამოიწვევს ადამიანების უფლებების ფართოდ დარღვევასა და ომის დანაშაულს, თუ დიპლომატია საკუთარ მიზანს ვერ შეასრულებს".
2021 წლის 11 დეკემბერს რუსეთის საგარეო საქმეთა სამინისტრომ NATO-ს სთხოვა, რომ გააუქმოს 2008 წლის ბუქარესტის სამიტზე დადებული პირობა, საქართველოსა და უკრაინის ჩრდილოატლანტიკურ ალიანსში გაწევრიანებასთან დაკავშირებით.
რუსეთის მოთხოვნის საპასუხოდ NATO-ს გენერალური მდივანმა, იენს სტოლტენბერგმა თქვა, რომ ყველა ქვეყანას აქვს უფლება, აირჩიოს საკუთარი გზა, მათ შორის, თუ რა სახის უსაფრთხოების შეთანხმების მონაწილე სურს, რომ იყოს. მისივე შეფასებით, მიუღებელია, რომ რუსეთი ცდილობს, გავლენის სფეროების სისტემა აღადგინოს.
მოგვიანებით 17 დეკემბერს რუსეთის საგარეო საქმეთა სამინისტრომ გამოაქვეყნა აშშ-სთან და NATO-სთან უსაფრთხოების გარანტიებზე მოლაპარაკების პროექტი. რუსეთი ჩრდილოატლანტიკურ ალიანსსა და აშშ-ს, ფაქტობრივად, ჯარებისა და შეიარაღების 1997 წლის მაისის განლაგებაზე დაბრუნებას სთხოვს, ანუ იმ დროინდელ პოზიციებზე დაბრუნებას სანამ აღმოსავლეთ ევროპის ქვეყნებს NATO-ში მიიღებდნენ. ასევე, მოსკოვი კიდევ ერთხელ ითხოვს ალიანსის გაფართოების შეჩერებასა და მასში უკრაინის გაწევრიანების დაუშვებლობას უსვამს ხაზს. პროექტის მიხედვით, NATO-მ უნდა შეაჩეროს სამხედრო საქმიანობა უკრაინაში, აღმოსავლეთ ევროპაში, კავკასიასა და ცენტრალურ აზიაში.
იანვრის პირველ ნახევარში დასავლეთსა და რუსეთს შორის გამართული დიპლომატიური შეხვედრები უშედეგოდ დასრულდა.
პარალელურად უკრაინის საზღვრებთან რუსეთის სამხედრო ძალების თავმოყრის გამო ორ ქვეყანას შორის მდგომარეობა კვლავ დაძაბულია. კიევისა და ვაშინგტონის ცნობებით, უკრაინის საზღვრებთან ასიათასამდე რუსი სამხედროა თავმოყრილი. გრძელდება შეიარაღებული ძალების ამ ტერიტორიაზე უჩვეულო თავმოყრა და გადაადგილება. არსებობს შიში, რომ რუსეთი უკრაინაში შეჭრისთვის ემზადება.
ვრცლად უკრაინის საზღვრებთან არსებული დაძაბულობისა და ომის შესაძლებლობის შესახებ წაიკითხეთ აქ – უკრაინა ახალი ომის მოლოდინში – დასავლეთს ძილის დრო არ აქვს.
