აშშ-ჩინეთი

პელოსი: აშშ-მ პეკინის 2022 წლის ოლიმპიადას დიპლომატიური ბოიკოტი უნდა გამოუცხადოს

ნენსი პელოსი
Reuters

წარმომადგენელთა პალატის თავმჯდომარემ, ნენსი პელოსიმ, თქვა, რომ აშშ-მ 2022 წლის პეკინის ზამთრის ოლიმპიადას ჩინეთში ადამიანის უფლებების დარღვევების გამო დიპლომატიური ბოიკოტი უნდა გამოუცხადოს.

აშშ-ს კანონმდებლები, ადამიანის უფლებადამცველები აშშ-ს მთავრობას აქტიურად მოუწოდებენ, რომ პეკინის ოლიმპიადას დიპლომატიური ბოიკოტი გამოუცხადოს, რაც გულისხმობს იმას, რომ სპორტსმენებს თამაშებში მონაწილეობის მიღება შეეძლებათ, თუმცა მთავრობის პირები პეკინში არ ჩავლენ.

ნაწილი თამაშების სხვა ადგილზე გამართვას ითხოვს. მათ შორის, ზოგიერთი კონგრესმენი, პელოსისგან განსხვავებით, ოლიმპიური თამაშების ჩინეთიდან სრულიად გადატანას მოითხოვს.

სენატორებმა – მით რომნიმ და ტიმ კეინიმ წარადგინეს კანონმდებლობა, რისი მიღების შემთხვევაშიც ოლიმპიადაზე ამერიკის ნებისმიერი ოფიციალური დელეგაციის დაფინანსება აკრძალული იქნება. პელოსი ამას მხარს უჭერს. 

"მთავრობის პირების ჩინეთში მიმდინარე გენოციდის ფონზე ჩასვლა, მაშინ, როდესაც თქვენ თქვენს ადგილებზე სხედხართ, ნამდვილად გაჩნდება კითხვა, რა მორალური ავტორიტეტი გაქვთ, ილაპარაკოთ ადამიანის უფლებებზე ნებისმიერ ადგილას მსოფლიოში, თუ მზად ხართ, პატივი მიაგოთ ჩინეთის მთავრობას მაშინ, როდესაც ის გენოციდს სჩადის". – თქვა ნენსი პელოსიმ.

აპრილში საერთაშორისო რელიგიის თავისუფლებაზე აშშ-ს ფედერალურმა სამთავრობო კომისიამ ბაიდენის ადმინისტრაციას დაჟინებით მოუწოდა, რომ ჩინეთში რელიგიური დევნის, უიღური მუსლიმების რეპრესიის გამო 2022 წლის პეკინის ოლიმპიადაზე ოფიციალური პირები არ გაგზავნოს. 

პრეზიდენტმა ჯო ბაიდენმა 2021 წლის დასაწყისში თქვა, რომ პეკინის თამაშებიდან ამერიკელი ათლეტების აკრძალვის გეგმები არ აქვს.

აპრილში თეთრი სახლის სპიკერმა, იენ საკიმ, თქვა, რომ აშშ-ს ჯერ არ განუხილავს ბოიკოტის საკითხი მოკავშირეებთან და პარტნიორებთან.


შეგახსენებთ, რომ 19 იანვარს აშშ-ს ყოფილმა სახელმწიფო მდივანმა, მაიკ პომპეომ პეკინის მოქმედებები ჩინეთის სინძიანგის პროვინციაში მუსლიმი უიღურების წინააღმდეგ გენოციდად გამოაცხადა. აშშ-ს ახალი სახელმწიფო მდივანი, ენტონი ბლინკენი, პომპეოს გადაწყვეტილებას იზიარებს. თებერვალში ნიდერლანდების პარლამენტმა, ევროპაში პირველმა, ჩინეთი უიღურების გენოციდში დაადანაშაულა. მანამდე, კანადამ მიიღო რეზოლუცია, რის მიხედვითაც, ჩინეთის მიმართ უიღურებისადმი მოპყრობა გენოციდად გამოაცხადა. აპრილში გაერთიანებული სამეფოს პარლამენტმა სინძიანგის პროვინციაში ჩინეთის მიერ მუსლიმი უიღურების წინააღმდეგ განხორციელებული ქმედებები გენოციდად და კაცობრიობის წინაშე ჩადენილ დანაშაულად გამოაცხადა

2018 წელს ჩინეთმა კანონმდებლობა შეცვალა, რაც რეგიონულ მთავრობას ოფიციალურად აძლევს საშუალებას, გამოიყენოს "საგანმანათლებლო და საწვრთნელი ცენტრები" "ექსტრემისტული გავლენების" ქვეშ მყოფ პირთა გამოსასწორებლად. ჩინეთის ოფიციალური პირები საერთაშორისო საზოგადოების კრიტიკას უარყოფენ და ამბობენ, რომ ეს მხოლოდ გამოსასწორებელი ცენტრებია კრიმინალებისათვის. ადამიანები, რომლებმაც ამ ცენტრებს თავი დააღწიეს, ყვებიან, რომ ისლამის უარყოფას და კომუნისტური პარტიისათვის ერთგულების პირობის დადებას აიძულებდნენ და მათ პოლიტიკურ ინდოქტრინაციას ეწეოდნენ. ისინი არაადამიანური მოპყრობის შემთხვევებზე ყვებიან. მათი თქმით, დაკავებულთა მცირეწლოვან შვილებს მშობლებს აშორებენ და ბავშვთა სახლებში გადაჰყავთ.

ჩინეთის მთავრობა უიღურებს პოპულაციის გაკონტროლების მიზნით სხვადასხვა კონტრაცეპტივის გამოყენებას აიძულებს. სამთავრობო სტატისტიკაზე, სახელმწფო დოკუმენტებსა და ინტერვიუებზე დაყრდნობით AP-მ გამოძიება ჩაატარა. უკანასკნელი ოთხი წლის მანძილზე ჩინეთის მთავრობა სინძიანის პროვინციაში უიღურების წინააღმდეგ აქტიურ კამპანიას ატარებს, რომელსაც ზოგიერთი მკვლევარი „დემოგრაფიულ გენოციდსაც“ კი უწოდებს.

გასულ წელს გავრცელდა დოკუმენტები, რომლებშიც აღწერილია ჩინეთის სინძიანის პროვინციაში ეთნიკური და რელიგიური უმცირესობების დაკავების ბანაკებში არსებული სიტუაცია. დოკუმენტები მოიპოვა საგამოძიებო ჟურნალისტიკის საერთაშორისო კონსორციუმმა. იქ აღწერილია, როგორ ხდება დაკავება, ინდოქტრინაცია და დასჯა ბანაკებში. მილიონამდე ადამიანი სასამართლო პროცესის გარეშეა დაკავებული.

დოკუმენტებიდან ასევე ჩანს, რომ 2017 წელს მხოლოდ ერთ კვირაში 15 000 ადამიანი დააკავეს და ბანაკებში გადაიყვანეს. გარდა ამისა, 1.8 ადამიანი დაკვირვების ქვეშ მხოლოდ იმის გამო მოათავსეს, რომ ტელეფონებში მონაცემთა გაზიარების აპლიკაცია Zapya ჰქონდათ. ამის შემდეგ მთავრობამ 40 000-ზე მეტი ადამიანის შესახებ გამოძიება მოითხოვა, რათა მათ მიმართ არსებული ეჭვები გაქარწყლებულიყო. წინააღმდეგ შემთხვევაში, არსებობდა ბრძანება, რომ ისინი ბანაკებში გადაეყვანათ. გაიცა იმ უიღურების დაკავების ბრძანება, რომლებსაც სხვა ქვეყნის მოქალაქეობა ჰქონდათ. მონიტორინგი დაუწესეს საზღვარგარეთ მცხოვრებ უიღურებსაც, რაც იმაზე მიუთითებს, რომ ჩინეთის ამ საქმიანობაში მათი საელჩოებიც არიან ჩართული.

დეკემბერში ასევე გავრცელდა ინფორმაცია იმის შესახებ, თუ რა ტექნოლოგიას იყენებს ჩინეთი სინძიანგში უიღურების მასობრივი დაკავებებისთვის.

მანამდე New York Times-მა მოიპოვა დოკუმენტები, რომლებიც პრეზიდენტ სი ძინპინს რეგიონში მიმდინარე რეპრესიებთან აკავშირებს. დოკუმენტებში ჩანს, როგორ ხდება სინძიანში რელიგიური და ეთნიკური უმცირესობების მასობრივი დაკავება და მათი ახლობლების დაშინება.

ამერიკული ანალიტიკური ინსტიტუტის Center for Global Policy-ს დეკემბრის ანგარიშში წერენ, რომ ჩინეთი ასიათასობით უიღურს და სხვა ეთნიკური უმცირესობების წარმომადგენლებს ბამბის პლანტაციებში იძულებით ამუშავებს.

აღსანიშნავია, რომ 2020 წლის 9 ივლისს ვაშინგტონმა ჩინეთის პოლიტბიუროს წევრს, სინძიანგის უიღურების ავტონომიური რეგიონის კომუნისტური პარტიის მდივანს, ჩენ ცუანკუოს და სხვა მაღალი რანგის ჩინოვნიკებს სინძიანგში ადამიანის უფლებების დარღვევის გამო სანქციები დაუწესა. ტრამპის ადმინისტრაციაში ამბობენ, რომ ჩენი უმაღლესი რანგის ჩინელი მაღალჩინოსანია, რომელსაც კი აქამდე აშშ-ს სანქციები შეხებია.

2021 წლის დასაწყისში ჩინეთში ეთნიკური უმცირესობების წამებისა და ჯგუფური გაუპატიურების ახალი ფაქტები გავრცელდა.

კომენტარები