დაკავებული რუსი ოპოზიციონერი ალექსეი ნავალნი გულის შეტევის რისკის ქვეშ არის. ექიმები პოლიტიკოსის ჯანმრთელობის კრიტიკულ მდგომარეობაზე საუბრობენ და ნავალნისთან ექიმის დაშვებას ითხოვენ.
ნავალნის პირადი ექიმი ანასტასია ვასილიევა და კიდევ სამი მედიკოსი, მათ შორის კარდიოლოგი იაროსლავ აშიხიმი პორგოვის კოლონიის ადმინისტრაციისგან ითხოვენ, დაუშვან ისინი ნავალნისთან.
"ჩვენი პაციენტი ნებისმიერ მომენტში შეიძლება გარდაიცვალოს. კალიუმის დონე 7.1 მილი მოლი/ლიტრზე (ეს ძალიან ბევრია, კრეატინინის ზრდა 50%-ზე მეტით, შარდმჟავა 800 მილი მოლი/ლიტრზე მეტი. ეს შეიძლება დაკავშირებული იყოს თირკმელების პროგრესირებად უკმარისობაზე. პაციენტს კალიუმის ასეთი დონით უნდა აკვირდებოდნენ რეანიმაციაში, ვინაიდან ნებისმიერ მომენტში შეიძლება განვითარდეს ფატალური არითმია. სიკვდილი გულის გაჩერებით". - წერს კარდიოლოგი იაროსლავ აშიხიმი Facebook-ზე.
ჩვეულებრივ, როდესაც სისხლში კალიუმის დონე ერთ ლიტრზე 6.0 მილიმოლს აჭარბებს, საჭირო ხდება დაუყოვნებლივი მკურნალობა. ექიმების თანახმად, ნავალნის სისხლში კალიუმის დონე 7.1-ია. ექიმები ამბობენ, რომ ნავალნის სისხლის ანალიზის და ნოვიჩოკით მისი მოწამვლის გათვალისწინებით, აუცილებელია ის ექიმმა დაუყოვნებლივ გასინჯოს.
ნავალნის თანამოაზრე კირა იარმიში Facebook-ზე წერს, რომ ალექსეი ნავალნი კვდება. იარმიში რუსეთის მოსახლეობას მოუწოდებს, დარეგისტრირდნენ ნავალნის მხარდამჭერ აქციაზე. პოლიტიკოსის თანამოაზრეები გეგმავენ, "თანამედროვე რუსეთის ყველაზე დიდი პროტესტი" მოაწყონ. აქციის ზუსტი თარიღი მას შემდეგ გახდება ცნობილი, რაც აქციაზე ნავალნის 500 000 მხარდამჭერი დარეგისტრირდება. შაბათის მონაცემებით, ამჟამად აქციაზე 400 000-ზე მეტი ადამიანი დარეგისტრირდა. კირა იარმიშმა მოსახლეობას აქტიურობისკენ მოუწოდა. იარმიში ამბობს, რომ დიდმა პროტესტმა, შესაძლოა, ნავალნის სიცოცხლე გადაარჩინოს, "პუტინი მხოლოდ ქუჩის დიდ პროტესტზე რეაგირებს".
პოკროვის გამოსასწორებელ კოლონიაში გადაყვანის შემდეგ ალექსეი ნავალნის ჯანმრთელობის მდგომარეობა გაუარესდა. 31 მარტს მან შიმშილობა დაიწყო. პოლიტიკოსი ითხოვს ზურგის ძლიერი ტკივილების და კიდურების დაბუჟების გამო შესაბამისი მკურნალობა მიიღოს და ექიმმა გასინჯოს. შიმშილობის შედეგად ალექსეი ნავალნიმ მნიშვნელოვნად დაიკლო წონაში. პოკროვის კოლონიის ადმინისტრაცია პოლიტიკოსს იძულებით კვებით ემუქრება.
გასულ კვირას ნავალნის ადვოკატი, ოლგა მიხაილოვა ამბობდა, რომ მკურნალობა, რომელიც ალექსეი ნავალნის კოლონიაში დაუნიშნეს, "არაეფექტიანია და შეიძლება მდგომარეობის გართულება გამოიწვიოს". კოლონიის ექიმებმა ალექსეი ნავალნის შეატყობინეს, რომ მას მაგნიტორეზონანსული ტომოგრაფიით (მრტ) ხერხემლის ორი თიაქარი გამოუვლინდა, რაც იწვევს ზურგის ძლიერ ტკივილს და კიდურების დაბუჟებას.
ადამიანის უფლებათა დაცვის საერთაშორისო ჯგუფის, Amnesty International-ის თანახმად, რუსეთის მთავრობა, შესაძლოა, ნელა კლავს ნავალნის. ორგანიზაცია ამბობს, რომ რუსი ოპოზიციონერი ისეთ პირობებშია, რაც წამებას უდრის და ამან, შესაძლოა, მისი ნელა სიკვდილიც გამოიწვიოს.
ალექსეი ნავალნი რუსეთში გერმანიიდან 17 იანვარს დაბრუნდა, ის ქვეყანაში ჩასვლისთანავე დააკავეს. გერმანიაში ის "ნოვიჩოკის" ჯგუფის ნერვული აგენტით მოწამვლის შემდეგ მკურნალობდა.
რუსეთის სასჯელაღსრულების ფედერალური სამსახური ნავალნის "ივ როშეს" საქმეზე გამოსაცდელი ვადის დარღვევაში ედავებოდა და პირობითი სასჯელის რეალურით შეცვლას ითხოვდა.
2 თებერვალს ნავალნის სასამართლომ 2 წლითა და 8 თვით პატიმრობა მიუსაჯა "ივ როშეს" საქმეზე. აღსანიშნავია, რომ ნავალნის თავდაპირველად 3 წლითა და 6 თვით მიუსაჯეს პატიმრობა, თუმცა მის სასჯელს აკლდება შინაპატიმრობაში გატარებული 10 თვე.
2014 წელს ალექსეი ნავალნი და მისი ძმა ოლეგი დამნაშავედ ცნეს თაღლითობაში. გამოძიების ვერსიით, მათ დაარწმუნეს კომპანია "ივ როშე", გაეფორმებინათ არახელსაყრელი კონტრაქტი. რუსეთის სასამართლოს ალექსეი ნავალნის 3.5 წლით პირობითი სასჯელი და 5 წლით გამოსაცდელი ვადა, ხოლო მის ძმას 3.5-წლიანი პატიმრობა მიუსაჯა. მოგვიანებით ალექსეი ნავალნის გამოსაცდელი ვადა ერთი წლით გახანგრძლივდა და, შესაბამისად, 2020 წლის 30 დეკემბერს ამოიწურა.
2017 წელს ადამიანის უფლებათა ევროპულმა სასამართლომ დაადგინა, რომ ალექსეი ნავალნის და მის ძმას არ ჰქონდათ სამართლიანი სასამართლოს უფლება და განჩინება დაგმო, როგორც "უკანონო და თვითნებური" და "პოლიტიკურად მოტივირებული". რუსეთის ფედერაციამ ნავალნის კომპენსაცია გადაუხადა, თუმცა განაჩენი არ გაუუქმებია.
ალექსეი ნავალნის დაპატიმრებას რუსეთში ხალხმრავალი საპროტესტო აქციები მოჰყვა.
ალექსეი ნავალნის მოწამვლისა და დაპატიმრებისთვის ევროკავშირმა და აშშ-მ კოორდინირებულად რუს მაღალჩინოსნებს სანქციები მარტის დასაწყისში დაუწესეს. ბაიდენის ადმინისტრაციის ოფციალურმა პირებმა განაცხადეს, რომ აშშ-ს სახაზინო დეპარტამენტმა სანქციები დაუწესა რუსეთის მთავრობის მაღალი რანგის შვიდ წარმომადგენელს.
25 მარტს კანადის საგარეო საქმეთა სამინისტრომ 9 რუს მაღალჩინოსანსა და ძალოვანი სტრუქტურების წარმომადგენელს "რუსეთში ადამიანის უფლებების უხეში და სისტემატური დარღვევისთვის" სანქციები დაუწესა.
