საქართველოს ეკონომიკის მინისტრის, ნათია თურნავას მტკიცებით, "გამოჩნდა ვაქცინირებული ტურისტების პირველი ნაკადები". მთავრობის სხდომის შემდეგ მან თქვა, რომ თვის ბოლოს ისრაელის ავიაკომპანია შეასრულებს სამ ტურისტულ ჩარტერულ რეისს - 19, 21 და 22 მარტს, თელ ავივი - ბათუმის მიმართულებით.
"ეს არის შედეგი ჩვენი პირველი შემსუბუქების", - განაცხადა თურნავამ.
რაც შეეხება რეგულარულ სამგზავრო რეისებს, ეკონომიკის მინისტრის თქმით, მარტის განმავლობაში კვირაში 70-მდე ფრენა შესრულდება სხვადასხვა ავიაკომპანიის მიერ, ხოლო ზაფხულში ეს რიცხვი 200-მდე გაიზრდება. ნათია თურნავას ინფორმაციითვე, მარტის ბოლოს რეისებს განაახლებს ავიაკომპანია WIZZAIR-ი, "ამ მომენტის ინფორმაციით, 20 მიმართულებით, კვირაში 45 ფრენა".
საქართველო საზღვრებს უხსნის ტურისტებს ნებისმიერი ქვეყნიდან, თუ მათ გაკეთებული ექნებათ კორონავირუსზე ვაქცინის ორივე დოზა.