9 ივნისს ზუსტად ერთი წელი გავიდა მას შემდეგ, რაც ჰონგ-კონგში ბოლო 2 ათწლეულის მანძილზე ყველაზე მასშტაბური პროდემოკრატიული საპროტესტო აქციები დაიწყო, რომელიც დღესაც გრძელდება. 2019 წლის 9 ივნისს ჰონგ-კონგის ქუჩებში დაახლოებით მილიონი მოქალაქე ჰონგ-კონგიდან კომუნისტურ კონტინენტურ ჩინეთში ექსტრადიციის კანონპროექტის გასაპროტესტებლად გამოვიდა.
ჰონგ-კონგში ახალი კორონავირუსის გამო ამჟამად მხოლოდ 8 პირის შეკრებაა დაშვებული. აქციის პარალელურად ადგილზე მობილიზებულია სპეცრაზმი.
დღის განმავლობაში ქალაქი სხვადასხვა სავაჭრო ცენტრში ჰონგ-კონგის დემოკრატიის მხარდამჭერ სლოგანებს გაიძახდნენ.
ჰონგ-კონგის ლიდერმა, კერი ლამმა, ამ თარიღთან დაკავშირებით განაცხადა, რომ ქალაქი მეტ "ქაოსს" არ აიტანს.
გასული წლის განმავლობაში ჰონგ-კონგში აქციებზე 11-დან 84 წლამდე დაახლოებით 9 000 ადამიანი დააკავეს. აქედან 600-ზე მეტ პირს არეულობის მოწყობის გამო ბრალი წარუდგინეს.
ექსტრადიციის კანონპროექტი 5-თვიანი პროტესტის შემდეგ, რომელსაც პოლიცია ხშირად ძალადობრივად შლიდა, გაიწვიეს, მაგრამ აქციები ამით არ დასრულებულა. მოქალაქეები თავისუფალ არჩევნებს, აქციაზე დაპატიმრებულების გათავისუფლებას, აქციებზე პოლიციის ქმედებების დამოუკიდებელ გამოძიებას, საპროტესტო აქციების აღწერის, როგორც "არეულობის", შეწყვეტას, კერი ლამის გადადგომას და ზოგადად, მეტ თავისუფლებას და პეკინის წნეხისგან გათავისუფლებას ითხოვდნენ.
მას შემდეგ სიტუაცია ბევრად გამწვავდა. მაისში ჩინეთმა განიზრახა, რომ ჰონგ-კონგის ახალი ეროვნული უსაფრთხოების კანონები მიიღოს, რაც ჰონგ-კონგის ავტონომიის ფაქტობრივ დასრულებას ნიშნავს.
ახალი ეროვნული უსაფრთხოების კანონპროეტქების გამო, მომავალ დღეებში კიდევ არაერთი საპროტესტო აქციაა დაგეგმილი.
კანონპროექტების დეტალები ჯერჯერობით უცნობია, თუმცა მედიაში გავრცელდა ინფორმაცია, რომ კანონების მიღების შემთხვევაში ჩინეთისგან ჰონგ-კონგის სეცესია სისხლის სამართლის დანაშაული იქნება. ასევე, დანაშაული იქნება ჰონგ-კონგის საშინაო საქმეებში ნებისმიერი საგარეო ძალის ჩარევა, ტერორიზმი და ყველა ქმედება, რომელიც ცენტრალური ხელისუფლების დამხობისკენ იქნება მიმართული.
ახალი კანონებით, შესაძლოა, პეკინმა ჰონგ-კონგში კონტინენტური ჩინეთის სადაზვერვო სააგენტოები განათავსოს, რაც ნიშნავს იმას, რომ ჩინელ მაღალჩინოსნებს ჰონგ-კონგში პირდაპირ შეეძლებათ კანონების აღსრულება.
ამ ყველაფრით კი ჰონგ-კონგს, რომელსაც 1997 წლის "ერთი ქვეყანა, ორი სისტემის" შეთანხმებით, ავტონომია გარანტირებული უნდა ჰქონდეს, საფრთხე ემუქრება. ჩინეთის ეს ქმედება იქნება პასუხი გასულ წელს ჰონგ-კონგის მასშტაბურ პროდემოკრატიულ აქციებზე - ჰონგ-კონგის თავისუფლებისთვის და პეკინის გაზრდილი წნეხის საწინააღმდეგოდ.
ჰონგ-კონგში დემოკრატიის მომხრე კანონმდებლები ამბობენ, რომ კანონპროეტების საბოლოოდ მიღება "ჰონგ-კონგის სიკვდილი იქნება".
აშშ-ში უკვე განაცხადეს, რომ ჰონგ-კონგი ავტონომია აღარ არის.
ჰონგ-კონგის გამო, აშშ-ის პრეზიდენტმა, დონალდ ტრამპმა, ჰონგ-კონგის სპეციალური სტატუსის გაუქმება და ოფიციალური პირებისთვის სანქციების დაწესება დააანონსა.
ბრიტანეთმა და ტაივანმა ჰონგ-კონგელებს დახმარება უკვე აღუთქვეს.