სააღდგომო ღამისთევის ლიტურგიისთვის მრევლის ნაწილი ეკლესიებში 21:00 საათამდე შეიკრიბა. ახალი კორონავირუსის პრევენციისთვის დაწესებული შეზღუდვების მიხედვით, ისინი ტერიტორიას დილის 06:00 საათამდე ვერ დატოვებენ.
აღდგომა ქრისტიანებისთვის უმთავრესი დღესასწაულია და ამ დღეს, როგორც წესი, მორწმუნეთა დიდი ნაწილი ეკლესიებში იკრიბება, თუმცა, ახალი კორონავირუსით გამოწვეული საფრთხეების გამო, იმ ტაძრების უმრავლესობაში, რომელიც ტაბულამ მოინახულა, მათი რაოდენობა სააღდგომო დღესასწაულისთვის მცირე ჩანს.
მღვდელმთავრებისა და მღვდლების ნაწილი მრევლს არწმუნებდა, რომ ერთი კოვზით ზიარებით, შეუძლებელი იყო, მათ რაიმე გადასდებოდათ.
"ვიღაცა ამბობს, ეზიარებით და შეიძლება ამით საფრთხეს ქმნით, არ დაიჯეროთ. ერთად დგახართ გვერდიგვერდ და ეს შეიძლება გადამდები იყოს და სხვისთვის ზიანის მომტანი, არ დაიჯეროთ. გამორიცხულია, რომ მსახურებაზე რაიმე ცუდი მოხდეს,"- ამბობდა აბბა ალავერდელი მიტროპოლიტი დავითი.
მეორე ნაწილი კი ამბობდა, რომ თუკი მრევლი აღდგომის დღესასწაულზე არ მივიდოდა, შესაძლოა, მათთვის სანანებელი გამხდარიყო.
"ის ადამიანები, ვინც მრევლს მოსვლას უშლის, მათი პრობლემაა და ვინც მათ ნებას დაჰყვება და შიშს გამოიჩენს, შემდეგ ეს შესანანებელი ექნებათ. იმის გამო, რომ ვინმე არ მოვიდეს, არავის განვიკითხავთ, მაგრამ ველოდებით, რომ შემდეგ ხალხმა ეს შეინანოს," - თქვა ბაგრატის ტაძრის წინამძღვარმა გიორგი პაპავამ.
მრევლის მცირე რაოდენობისა და მათ შორის დაცული ფორმალური დისტანციის მიუხედავად, ეპიდემიური აფეთქების შანსი კვლავ რეალურია, ვინაიდან წირვის მიწურულს ეკლესიებში შეკრებილი მრევლი ერთი კოვზით ეზიარება.
მრევლის ერთი თვალის შევლებით სიმცირე (წინა დღესასწაულებთან შედარებით), შესაძლოა, ასევე შედეგი იყოს მთავრობის გადაწყვეტილებისაც, რომლის მიხედვითაც 17 აპრილიდან მსუბუქი ავტომობილებით გადაადგილება აიკრძალა. მრევლის ნაწილს კი ეკლესიებამდე ფეხით მისვლა და 9-საათიანი ლიტურგიის შემდეგ წამოსვლა დასჭირდება.
ტაბულა მცხეთა-თბილისის ეპარქიის რამდენიმე ტაძარში იმყოფებოდა. გთავაზობთ ფოტოგალერეას: