პარლამენტის ოფიციალურ ფეისბუქ გვერდზე მოქალაქეები პროპორციულ სისტემაზე გადასვლის შესახებ პროექტის კენჭისყრის გაჭიანურებას ეხმაურებიან და დეპუტატებს მიმართავენ, რომ ცვლილებების ჩაგდება არ გაბედონ.
თავდაპირველად, მოქალაქეები ფეისბუქ გვერდზე, შეფასების ნაწილში წერდნენ #არგაბედო, #არჩააგდო, #გადაყვები, თუმცა, რამდენიმე წუთის შემდეგ გვერდზე შეფასების სისტემა გაითიშა. ამის გამო, იგივე შინაარსის მოთხოვნები უკვე კომენტარებში იწერება.
ფლეშმობი მოძრაობის "ქვეყნის სამსახურში" წარმომადგენლებმა დაგეგმეს და მას სხვა ადამიანებიც შეუერთდნენ.
შეგახსენებთ, რომ "ქართული ოცნების" მაჟორიტართა ნაწილი არჩევნების პროპორციულ სისტემაზე გადასვლას ეწინააღმდეგება. რამდენიმე დეპუტატმა თქვა, რომ ისინი ამ საკითხზე ბიძინა ივანიშვილს შეხვდნენ, თუმცა, ქართული ოცნების თავმჯდომარემ მათი "გადარწმუნება ვერ შეძლო".
გუშინ, 13 ნოემბერს, "ქართულმა ოცნებამ" პროპორციულ საარჩევნო სისტემაზე გადასვლის კენჭისყრა გადადო. პარლამენტის თავმჯდომარის თქმით, ქართულ ოცნებაში ამ საკითხთან დაკავშირებით მსჯელობა იყო საჭირო. უმრავლესობის სხდომის შემდეგ კი ცნობილი გახდა, რომ ამ თემაზე თავისუფალი კენჭისყრა იქნება.
მმართველი გუნდის მიერ შემუშავებულ კანონპროექტს, რომელიც 2020 წლის საპარლამენტო არჩევნების პროპორციული წესით ჩატარებას გულისხმობს, 0%-იანი ბარიერით და ბლოკებად გაერთიანების აკრძალვით, პარლამენტი სამი დღეა, განიხილავს.მოწინააღმდეგეებს შორის არის არის დიმიტრი ხუნდაძე, რომელმაც თქვა, რომ კანონის "ჩასაგდებად ემზადებოდა".
2020 წლის საპარალამენტო არჩევნების პროპორციული სისტემით ჩატარების დაპირება მმართველმა გუნდმა 24 ივნისს გასცა, მას შემდეგ, რაც 20 ივნისს განვითარებულ მოვლენებს მასშტაბური პროტესტი მოჰყვა. აქციის მონაწილეთა ერთ-ერთი მთავარი მოთხოვნა სწორედ 2020 წლის საპარლამენტო არჩევნების პროპორციული წესით ჩატარება იყო.