სტატისტიკის ეროვნული სამსახური აქვეყენბს 2019 წლის იანვარი-აგვისტოს ვაჭრობის ჩაშლილ მონაცემებს, რომლის მიხედვითაც წლის პირველ რვა თვეში ექსპორტი თითქმის თანაბრად გაიზარდა როგორც ევროკავშირის, ისე დსთ-ს ქვეყნებში.
მთლიან ექსპორტში 52.8% ეკავა დსთ-ს ქვეყნებს, 23.7% კი ევროკავშირისას.
იმპორტი ევროკავშირიდან 11.6%-ით შემცირდა, დსთ-დან კი 14.7%-ით. ევროკავშირის ქვეყნებზე მთლიანი იმპორტის 25.9% მოდის, დსთ-ს ქვეყნებზე კი 26.1%.
ქვეყნების მიხედვით, ყველაზე მეტი ექსპორტი გავიდა რუსეთში (მთლიანი ექსპორტის 14%), აზერბაიჯანსა (13.1%) და სომხეთში (9%).
ყველაზე მეტი იმპორტი შემოვიდა თურქეთიდან (17.4%), ჩინეთიდან (10%) და რუსეთიდან (9.9%).
ამგვარად, თურქეთი რჩება საქართველოს უმსხვილეს სავაჭრო პარტნიორად.
უმსხვილესი საექსპორტო საქონელი იანვარ აგვისტოში იყო სპილენძის მადნები (მთლიანი ექსპორტის 17.9%), მსუბუქი ავტომობილები (15.8%) და ფეროშენადნობები (8.6%).
იანვარ-აგვისტოში საქართველოს სავაჭრო ბრუნვა გასული წლის ანალოგიურ პერიოდთან შედარებით 0.01%-ითაა გაზრდილი. ექსპორტი 12.4%-ით მეტი იყო, იმპორტი კი 4.4%-ით ნაკლები.
სავაჭრო დეფიციტი იანვარ-აგვისტოში სავაჭრო ბრუნვის 40.6%-ს შეადგენდა.