მოსკოვში ტვერის სასამართლომ რუსეთის ოპოზიციის ლიდერს ალექსეი ნავალნის პოლიციის თანამშრომლების კანონიერი მოთხოვნების დაუმორჩილებისთვის, 15-დღიანი პატიმრობა მიუსაჯა.
აღნიშნულ გადაწყვეტილებამდე, სასამართლომ ნავალნი არასანქცირებული აქციის ორგანიზებაშიც ცნო დამნაშავედ და ჯარიმის სახით, 20 000 რუბლის [352 დოლარი] გადახდა დააკისრა.
სასამართლო პროცესის დროს ნავალნიმ სასამართლოში რუსეთის პრემიერის დმიტრი მედვედევის გამოძახება მოითხოვა.
"მსურს, სასამართლოში გუშინდელი მიტინგის რეალური ორგანიზატორი გამოიძახოთ. ის შეძლებს იმის ახსნას, თუ რატომ გამოვიდა აქციაზე ამდენი ადამიანი", - თქვა ნავალნიმ.
გუშინ მოსკოვში გამართულ ანტიკორუფციულ მიტინგზე რუსეთის ოპოზიციის ლიდერი ალექსეი ნავალნი და სულ მცირე 500 დემონსტრანტი დააკავეს.
გავრცელებული ინფორმაციით, პოლიციამ აქციის მონაწილეების წინააღმდეგ ხელკეტები და ცრემლსადენი გაზი გამოიყენა.