ფარული ჩანაწერების გამოქვეყნების შემდეგ, პოლონეთში სამი მინისტრი და პარლამენტის სპიკერი თანამდებობიდან გადადგა.
სპიკერ რადოსლავ სიკორსკის, ჯანდაცვის, ფინანსთა და სპორტის მინისტრების განცხადებით, მათ პოსტები მმართველი მემარჯვენე-ცენტრისტული სამოქალაქო პლატფორმის პარტიის ინტერესების დასაცავად დატოვეს.
ფარულ ჩანაწერებში სიკორსკი დიდი ბრიტანეთის პრემიერმინისტრს დევიდ კამერონს არაკომპეტენტურს უწოდებს, აშშ-სთან პოლონეთის ურთიერთობას კი გამოუსადეგარს და მონურს. ასევე, პოლონეთის აშშ-სთან ურთიერთობას ორალურ სექსს ადარებს. სიკორსკი ასევე ამბობს, რომ პოლონეთი მსგავსი მიდგომით გერმანიისა და რუსეთის გულისწყრომას გამოიწვევს.
ფარული ჩანაწერები 2013-14 წლებში ვარშავის სხვადასხვა რესტორანშია გაკეთებული, სადაც მაღალჩინოსნები პირად შეხვედრებს მართავდნენ. ჩანაწერები პოლონურმა გაზეთმა Wprost-მა გამოაქვეყნა.
მინისტრები არჩევნებამდე 4 თვით ადრე გადადგნენ.
