ერთიანი ნაციონალური მოძრაობის დეპუტატი ნუგზარ წიკლაური დღეს ბათუმში პარტიის წარმომადგენლების დაკავებას სპეციალური ბრიფინგით გამოეხმაურა. როგორც წიკლაურმა აღნიშნა, პარტიის წევრები - რეზო ხარაზი, სოლომონ ბაჯელიძე და მიკირტიჩიანი, რომლებიც ბათუმში შეჩერებულ პროექტებსა და არსებულ მდგომარეობას აპროტესტებდნენ, თავისუფალი აზრის გამოხატვის გამო დააკავეს. დეპუტატი ხელისუფლებას მათი გათავისუფლებისკენ მოუწოდებს.
"დღეს ბათუმში პრემიერ ირაკლი ღარიბაშვილის ვიზიტის დროს, ერთიანი ნაციონალური მოძრაობის წევრები დააკავეს, რომლებიც ნეპოტიზმისა და კორუფციის ფაქტებს აპროტესტებდნენ. ასევე, შეჩერებულ მშენებლობებს. როგორც ჩანს, ხელისუფლება პრობლემების მოგვარების გზად არა მათზე რეაგირებას, არამედ იმ ადამიანების დაკავებას ხედავს, რომლებიც შექმნილ ვითარებას აპროტესტებენ და ამაზე ღიად საუბრობენ. თავისუფალი აზრის დევნამ სისტემატური სახე მიიღო. ჩვენ მოვუწოდებთ ქვეყანაში აკრედიტებულ საელჩოებსა და არასამთავრობო ორგანიზაციებს, თვალყური ადევნონ ამ შემაშფოთებულ პროცესს. ხელისუფლებას, რომელიც პრობლემებს ვერ უმკლავდება, მოქალაქეები ყველგან დახვდებიან და მათი უნიათობის სიმბოლოდ, წითელ ბარათებს აღმართავენ. მოვუწოდებ ხელისუფლებას, გაათავისუფლოს ადამიანები, რომლებიც თავისუფალი აზრის გამოხატვის გამო დააკავეს", - განაცხადა ნუგზარ წიკლაურმა.
