ტაბულას წყაროს ინფორმაციით, ინფრასტრუქტურის მინისტრის დავით შავლიაშვილის მრჩეველი მაია (რეინა) გვენეტაძე პარალელურად, სტომატოლოგად, კლინიკა სმაილ დენტში მუშაობს, რაც საჯარო სამსახურის შესახებ კანონთან შეუსაბამობაშია. კერძოდ, საჯარო სამსახურში ინტერესთა შეუთავსებლობისა და კორუფციის შესახებ საქართველოს კანონის მე-13 მუხლის მე-2 პუნქტის შესაბამისად, "თანამდებობის პირს უფლება არა აქვს ასრულებდეს რაიმე ანაზღაურებად სამუშაოს, გარდა სამეცნიერო, პედაგოგიური ან შემოქმედებითი საქმიანობისა, ან ეკავოს რაიმე თანამდებობა რომელიმე სხვა სახაზინო დაწესებულებაში ან სახაზინო საწარმოში, ან ასრულებდეს რაიმე ანაზღაურებად სამუშაოს ან ეკავოს რაიმე თანამდებობა სხვა ქვეყნის ორგანოში ან დაწესებულებაში".
გარდა იმისა, რომ მაია გვენეტაძე სტომატოლოგიურ კლინიკაში მუშაობს, საჯარო რეესტრის მონაცემებით, რეინა გვენეტაძე შპს სმაილ-დენტი - 2008-ის მფლობელიც არის. ასევე, სტომატოლოგიური კლინიკების ჩამონათვალში, მაია გვენეტაძე კლინიკის ხელმძღვანელად არის მითითებული.
ტაბულას ინფრასტრუქტურის სამინისტროს საზოგადოებასთან ურთიერთობის სამსახურში დაუდასტურეს, რომ მაია იგივე რეინა გვენეტაძე ნამდვილად ინფრასტრუქტურის მინისტრის მრჩეველია. ხოლო ინფორმაცია, რომ ის პარალელურად, კლინიკაშიც მუშაობს, არ აქვთ.
ტაბულამ სტომატოლოგიურ კლინიკა სმაილ-დენტშიც დარეკა და სტომატოლოგ მაია გვენეტაძესთან ჩაწერა ითხოვა. პასუხად, ჟურნალისტს უთხრეს, რომ "მაია გვენეტაძე არ მეყოლება და ვერ ჩაგწერთ. სხვა ექიმთან, ვისთანაც გნებავთ, ჩაგწერთ". კითხვაზე, როდის იქნება გვენეტაძე, მათ უპასუხეს, რომ "არ იქნება მაიკო".
