გიგა ბოკერია ნაციონალური მოძრაობის პრაიმერიზში კანდიდატის სტატუსით მონაწილეობას არ მიიღებს - ამის შესახებ უშიშროების საბჭოს მდივანმა რუსთავი 2-ის ეთერში, გადაცემა პოზიციაში განაცხადა.
„მიუხედავად იმისა, რომ ამ პოლიტიკური გუნდის წევრი ვიყავი, ვარ და ვიქნები მომავალშიც, ვარ უშიშროების საბჭოს მდივანი და ასეთ პარტიულ დისკუსიაში, ამ თემაზე საჯაროდ არ მინდა სპეკულირება. თუმცა გარკვევით შემიძლია ვთქვა, რომ ამ პროცეში მონაწილეობას, როგორც კანდიდატი, არ მივიღებ. არა იმიტომ, რომ ამ პროცესის წინააღმდეგი ვარ. უბრალოდ რეალისტური შეხედულება მაქვს საკუთარ შესაძლებლობებზე", - განაცხადა გიგა ბოკერიამ.
კითხვაზე, თუ რა შეხედულება აქვს საპრეზიდენტო არჩევნებზე ნაციონალური მოძრაობის შესაძლებლობებზე, უშიშროების საბჭოს მდივანი პასუხობს, რომ პოლიტიკური პროგნოზების გაკეთება არ სურს, თუმცა ფაქტია, რომ ნაციონალური მოძრაობა მთავარი ოპოზიციური ძალაა ქვეყანაში.
„შუალედურმა რჩევნებმა აჩვენა, რომ მიუხედავად მმართველი პარტიის დიდი უპირატესობისა, რაც ბუნებრივი იყო დიდი პოლიტიკური გამარჯვების შემდეგ, ნაციონალური მოძრაობა ცალსახად მთავარი ოპოზიციური ძალაა. მას 20%-ის ფარგლებში აქვს მხარდაჭერა. ეს კმაყოფილების საფუძველი არცერთი პარტიისთვის არ შეიძლება იყოს. ეს დიდი ვარდნაა და ნაციონალურმა მოძრაობამ, როგორც ყველა პარტიამ, რომელიც არჩევნებში დამარცხდა, უნდა გააგრძელოს საკუთარი შეცდომების ანალიზი.
საქართველოში დემოკრატიული ცვლილებების შემდეგ (როცა არჩევნების გზით პირველად შეიცვალა ხელისუფლება), ხელისუფლების მეორე ტესტია, რომ გამარჯვებულებს არ უნდა ჰქონდეთ ილუზია, რომ დამარცხებული გაქრება, რადგან მათ ის არ მოსწონთ. ეს არ მოხდა, რაც კარგია დემოკრატიისთვის. ვიმედოვნებ, რომ ნაციონალური მოძრაობა გაძლიერდება, იმ პერიოდში სანამ დემოკრატიული მანდატი აქვს ამ ხელისუფლებას, ეს იქნება მთავარი ოპოზიციური ძალა, რომელიც გააგრძელებს ოპონირებას ზოგჯერ ძალიან მწვავედ. საქართველო უნდა წავიდეს ამ გზით. ამას უნდა შეეგუოს დღევანდელი მთავრობა, პირველ რიგში, პრემიერმინისტრი. აქ ჩვენ ჯერ არ გვაქვს ცალსახად საქმე", - ამბობს გიგა ბოკერია.
