პრეზიდენტი პარლამენტს სისხლის სამართლის კოდექსიდან ეკონომიკურ-სამეწარმეო დანაშაულებთან დაკავშირებული ზოგიერთი მუხლის გაუქმებას სთავაზობს.
ეკონომიკურ, სამეწარმეო, ფულად-საკრედიტო და საფინანსო სფეროებში უკვე ჩადენილი დანაშაულების ამნისტირების გარდა, მიხეილ სააკაშვილი მათი დეკრიმინალიზაციის წინადადებითაც გამოდის. მის მიერ მომზადებულ კანონპროექტში 12 მუხლი მოხვდა - 182/2-ე (სააღსრულებო საქმიანობა ლიცენზიის გარეშე), 192-ე (უკანონო სამეწარმეო საქმიანობა), 192/1-ე (უკანონო საგანმანათლებლო საქმიანობა), 193-ე (ცრუ მეწარმეობა), 195/1-ე (სახელმწიფო შესყიდვებში მონაწილეობის წესის დარღვევა), 197/1-ე (ფალსიფიცირებული ნივთის უკანონო გადაზიდვა ან გასაღება), 201-ე (ყალბი რეკლამა), 204/1-ე (ბუღალტრული აღრიცხვის წესის დარღვევა), 206-ე (საბუღალტრო წიგნის წარმოების წესის დარღვევა გადახდისუუნარობისას), 213-ე (ფასიანი ქაღალდების ბაზრის წესის დარღვევა), 217-ე (საზღვარგარეთიდან უცხოურ ვალუტაში თანხის დაუბრუნებლობა), 219-ე (მომხმარებლის მოტყუება).
ამავე პროექტის ფარგლებში მიხეილ სააკაშვილი ცალკეულ ეკონომიკურ დანაშაულებთან დაკავშირებით თავისუფლების აღკვეთის გაუქმებისა და სასჯელის სახით მხოლოდ ჯარიმის ან საზოგადოებისთვის სასარგებლო შრომის გამოყენების წინადადებით გამოდის. ეს სსკ-ის შემდეგი მუხლებია: 196-ე (სასაქონლო (მომსახურების) ნიშნის ან სხვა კომერციული აღნიშვნის მართლსაწინააღმდეგო გამოყენება), 197-ე (ფალსიფიკაცია), 198-ე (ადამიანის სიცოცხლისათვის ან ჯანმრთელობისათვის საშიში პროდუქციის დამზადება, შემოტანა ან რეალიზაცია), 199-ე (ეკომარკით უკანონოდ სარგებლობა), მე-200 მუხლის I ნაწილი (მარკირებას დაქვემდებარებული აქციზური საქონლის აქციზური მარკის გარეშე გამოშვება, შენახვა, რეალიზაცია ან გადაზიდვა), 200/3-ე მუხლის I და II ნაწილები (სამეწარმეო საქმიანობისათვის საქონლის სასაქონლო ზედნადების გარეშე ტრანსპორტირება, მყიდველის მოთხოვნისას სასაქონლო ზედნადების გაუცემლობა ან საქონლის შეძენისას სასაქონლო ზედნადების მიღებაზე უარი), 200/4-ე (სავალდებულო მარკირებას დაქვემდებარებული არააქციზური საქონლის მარკირების ნიშნის გარეშე გამოშვება, შენახვა, რეალიზაცია ან გადაზიდვა), 207-ე (გადახდისუუნარობის საქმის წარმოების გახსნის შესახებ განცხადების შეუტანლობა გადახდისუუნარობისას), 207/1-ე (მოვალის მართვასა და წარმომადგენლობაზე უფლებამოსილი პირის მიერ მეურვისათვის ინფორმაციის წარდგენის ვალდებულების დარღვევა) და 214-ე მუხლის I ნაწილი (საქართველოს საბაჟო საზღვარზე დიდი ოდენობით მოძრავი ნივთის გადატანა ან გადმოტანა, ჩადენილი საბაჟო კონტროლის გვერდის ავლით ან მისგან მალულად, დოკუმენტის ან იდენტიფიკაციის საშუალების მოტყუებითი გამოყენებით, საბაჟო დეკლარაციაში ყალბი მონაცემების შეტანით).
