რუსეთის საგარეო საქმეთა მინისტრმა სერგეი ლავროვმა ეუთო გააკრიტიკა და მას ”არაეფექტური” ასევე ” პოლიტიზირებული” უწოდა. ვილნიუსში, ეუთოს მინისტერიალზე ლავროვმა განაცხადა, რომ ეუთო ”მოძველდა” და ”კრიტიკულ” მდგომარეობაშია , დასავლეთის ქვეყნებს კი არ სურთ ამ სიტუაციის შეცვლა. რუსეთის საგარეო საქმეთა მინისტრმა ასევე თქვა : ”ჩვენ სერიოზულად გვაშფოთებს გაეროს უშიშროების საბჭოს რეზოლუციების შეგნებულად, არასამართლებრივი მიზნებისთვის გამოყენება და შიდასახელმწიფოებრივ კონფლიქტებში ჩარევის მცდელობები, კონფლიქტის ერთ-ერთი მხარის სასარგებლოდ, მათ შორის ძალის გამოყენებით”.
ლავროვი ვალში არც აშშ-ს სახელმწიფო მდივანს დარჩენია, რომელმაც ვილნიუსიდან გააკრიტიკა რუსეთში ჩატარებული არჩევნები და თქვა, რომ ეს არჩევნები ”არ იყო თავისუფალი , არც სამართლიანი”. რუსეთის საგარეო უწყების ხელმძღვანელმა აღნიშნა: ”როგორც ჩანს ქალბატონი კლინტონი ლიტვაში ჩამობრძანდა იმისთვის, რომ ამერიკელების წინაშე თავი მოეწონებინა.”