საზოგადოებრივი მაუწყებლის პირდაპირ ეთერში პრესკონფერენციის გაშუქებასთან დაკავშირებით ბიძინა ივანიშვილის პრეს-სამსახური ურთიერთგამომრიცხავ მოთხოვნებს აყენებდა. საზოგადოებრივი მაუწყებლის მიერ გავრცელებული განცხადების მიხედვით, ივანიშვილის მხარე მოითხოვდა მინიმუმ 40 წუთიან საეთერო დროს პრესკონფერენციისთვის, მაგრამ, ამავდროულად უარს ამბობდა ივანიშვილის კერძო საკუთრებაში ( მის რეზიდენციაში) მოძრავი სატელიტური სადგურისა და ტექნიკური პერსონალის შეშვებაზე, იმ მიზეზით რომ საკითხი ბიზნესმენის პირად დაცვასთან იყო შესათანხმებელი.
შეგახსენებთ ივანიშვილმა უარი თქვა მონაწილეობა მიეღო საზოგადოებრივი მაუწყებლის რომელიმე პოლიტიკურ თოქ- შოუში და პირდაპირ ეთერში გაეცა პასუხი გადაცემის წამყვანის შეკითხვებისთვის. მან მოითხოვა პრესკონფერენციის პირდაპირ ეთერში გაშუქება მისსავე რეზიდენციიდან. თანმდევი ურთიერთგამომრიცხავი მოთხოვნების დაყენების შესახებ ინფორმაციის გავრცელების შემდეგ , ივანიშვილის პრეს-სამსახურმა განმარტა, რომ პრესკონფერენციაზე მაუწყებლის მოძრავ სატელიტურ სადგურს და ტექნიკურ პერსონალს პრობლემები არ ექნებათ. პრესკონფერენცია 1 ნოემბერს გაიმართება, საზოგადოებრივი მაუწყებელი აცხადებს, რომ პრესკონფერენციას პირდაპირ ეთერს დაუთმობს იმ დროით, რაც საზოგადოების ინტერესის დაკმაყოფილებას დასჭირდება.
