გამოცემა Associated Press ევროპული დაზვერვის მაღალჩინოსანზე დაყრდნობით წერს, რომ რუსეთის საგარეო საქმეთა სამინისტრომ ვენესუელიდან რუსი დიპლომატების ოჯახების ევაკუაცია დაიწყო.
მაღალჩინოსანმა გამოცემას აცნობა, რომ ევაკუაცია ქალებსა და ბავშვებს მოიცავს, ხოლო პროცესი 19 დეკემბერს დაიწყო. მისი თქმით, რუსეთის საგარეო საქმეთა სამინისტროს მაღალჩინოსნები ვენესუელაში არსებულ ვითარებას "ძალიან ნაცრისფრად" აფასებენ.
თავის მხრივ, რუსეთის საგარეო საქმეთა სამინისტრომ სამთავრობო მედია TASS-ს განუცხადა, რომ ვენესუელიდან რუსეთის საელჩოს ევაკუაციის შესახებ Associated Press-ის მიერ გავრცელებული ინფორმაცია "ტუილია".
პარალელურად, აშშ-ს პრეზიდენტი დონალდ ტრამპი 22 დეკემბერს ადმინისტრაციის ეროვნული უსაფრთხოების მაღალჩინოსნებთან შეხვედრას გეგმავს მას შემდეგ, რაც აშშ-ს სანაპირო დაცვამ კარიბის ზღვაში ვენესუელიდან გამომავალი ტანკერების დაკავება დაიწყო, რომლებსაც აშშ-ს მიხედვით, სანქცირებული ვენესუელური ნავთობი გადააქვთ.
20 დეკემბერს აშშ-მ ვენესუელის სანაპიროს სიახლოვეს, საერთაშორისო წყლებში, ტრამპის განცხადების შემდეგ მეორე სანქცირებული ტანკერი დააკავა მას შემდეგ, რაც რამდენიმე დღის წინ აშშ-ს პრეზიდენტმა დონალდ ტრამპმა ვენესუელიდან გამავალ და შემავალ ყველა სანქცირებულ ნავთობტანკერზე ბლოკადა გამოაცხადა.
გამოცემა Bloomberg-ის ინფორმაციით, სუპერტანკერ Centuries-ზე, რომელიც პანამის დროშის ქვეშ დაცურავდა, 2 მილიონი ბარელი ვენესუელური ნედლი ნავთობი იყო. წყაროების მიხედვით, იურიდიულად ხომალდზე არსებული ნავთობი ჩინურ კომპანიას ეკუთვნის.
ტანკერის დაკავება აშშ-ს ეროვნული უსაფრთხოების მინისტრმა, კრისტი ნოემმა X-ზე დაადასტურა, რომ აშშ-ს სანაპირო დაცვამ, ომის დეპარტამენტის მხარდაჭერით, ნავთობტანკერი დააკავა, "რომლის ბოლო გაჩერებაც ვენესუელა იყო".
მას შემდეგ Reuters-მა წყაროზე დაყრდნობით დაწერა, რომ აშშ სანქცირებული ნავთობის გადამზიდ მესამე ტანკერსაც აედევნა და მის დაკავებას აპირებს.
ვენესუელის სანაპიროსთან აშშ-მ თავდაპირველად ნავთობტანკერი, სახელად Skipper, 10 დეკემბერს დააკავა, რის გამოც მადუროს რეჟიმმა აშშ "ცალსახა ქურდობაში" დაადანაშაულა და ტანკერის დაკავებას "საერთაშორისო მეკობრეობის აქტი" უწოდა.
Reuters-ის ცნობით, Skipper-ის დაკავებამ ვენესუელის ნავთობის საერთაშორისო გადაზიდვები საფრთხის ქვეშ დააყენა და რამდენიმე გადამზიდი კომპანია უკვე აიძულა, დაგეგმილი რეისები დროებით შეეჩერებინათ. მათ შორის გაჩერდა აზიისკენ მიმავალი სამი ახლად დატვირთული ტანკერიც.
წყაროები Reuters-ს ეუბნებიან, რომ ტანკერი Skipper-ის დაკავებისა და შემდეგ სხვა ტანკერების შეჩერების შედეგად ვენესუელამ უკვე საექსპორტო ნავთობის 6 მილიონი ბარელის დროულად გაყიდვა ვერ შეძლო.
ამასთან, Skipper-ის დაკავების შემდეგ Reuters-მა გაავრცელა ინფორმაცია, რომ ტრამპის ადმინისტრაცია ვენესუელური ნავთობის გადამტანი სხვა ტანკერების დაკავებასაც აპირებდა.
16 დეკემბერს ტრამპმა დაწერა, რომ "ვენესუელიდან გამომავალ და შემავალ ყველა სანქცირებულ ნავთობტანკერზე ტოტალური და სრული ბლოკადის" ბრძანება გასცა, რისი მიზანიც მადუროს რეჟიმისთვის მთავარი შემოსავლის წყაროს გადაჭრაა.
პარალელურად, 11 დეკემბერს აშშ-მ ვენესუელის წინააღმდეგ ახალი სანქციები გამოაცხადა, რომლის ფარგლებშიც შეზღუდვები დაუწესდა ნიკოლას მადუროს ცოლის სამ დისშვილს და ასევე მათთან დაკავშირებულ ექვს ნავთობტანკერსა და გადაზიდვის კომპანიებს.
ბოლო თვეებში ტრამპმა მადუროს რეჟიმის წინააღმდეგ წნეხი გაზარდა და, გავრცელებული ინფორმაციით, მას გადადგომისკენაც მოუწოდა. ამავდროულად, აშშ-ს კარიბის ზღვაში უჩვეულოდ დიდი რაოდენობის სამხედრო-საზღვაო ძალები ჰყავს მობილიზებული და ბოლო პერიოდში ტრამპის ადმინისტრაციის გადაწყვეტილებით პენტაგონმა ნარკოტრეფიკინგში ჩართულ ნავებზე საჰაერო იერიშების მიტანაც დაიწყო.
- დონალდ ტრამპი ვენესუელას პრეზიდენტს, ნიკოლას მადუროს ესაუბრა
- Telegraph: მადურომ ვენესუელის დატოვების სანაცვლოდ $200 მილიონი მოითხოვა
მადუროზე წნეხის გაძლიერების ფარგლებში ტრამპის ადმინისტრაციამ ვენესუელის მთავრობა უცხოურ ტერორისტულ ორგანიზაციადაც გამოაცხადა და რეჟიმი ნარკოტრეფიკინგში ჩართულობაში დაადანაშაულა.
