პენიტენციური სამსახური უარყოფს გიორგი ჩიკვაიძის დედის გავრცელებულ ინფორმაციას, იმის თაობაზე რომ პატიმარს მშობლებთან შეხვედრა აუკრძალეს.
სპეციალური პენიტენციური სამსახური განმარტავს, რომ "პენიტენციური კოდექსის 120-ე მუხლის შესაბამისად, 1 თვის განმავლობაში 2 ხანმოკლე პაემნის უფლება აქვს", ხოლო გიორგი ჩიკვაიძემ "სექტემბრის თვეში უკვე ისარგებლა კუთვნილი ხანმოკლე პაემნის უფლებით."
"სპეციალური პენიტენციური სამსახური ეხმიანება მედიასაშუალებების მიერ გავრცელებულ ინფორმაციას, თითქოს მსჯავრდებულ გ.ჩ.-ს აეკრძალა პაემნის უფლება. საზოგადოების ინფორმირებისთვის განვმარტავთ, რომ მსჯავრდებულ გ.ჩ.-ს, პენიტენციური კოდექსის 120-ე მუხლის შესაბამისად, 1 თვის განმავლობაში 2 ხანმოკლე პაემნის უფლება აქვს.
შესაბამისად, სექტემბრის თვეში გ.ჩ-მ უკვე ისარგებლა კუთვნილი ხანმოკლე პაემნის უფლებით. კერძოდ, ერთი ხანმოკლე პაემნის უფლებით მან ისარგებლა 2025 წლის პირველ სექტემბერს, ხოლო თვის განმავლობაში კუთვნილი მეორე ხანმოკლე პაემანი საკუთარი წერილობითი თხოვნის საფუძველზე, შეეცვალა სატელეფონო საუბრის უფლებით, პენიტენციური კოდექსის 119-ე მუხლის მე-7 ნაწილის „ა“ ქვეპუნქტის შესაბამისად. აქედან გამომდინარე, მსჯავრდებულ გ.ჩ.-ს, ხანმოკლე პაემნით სარგებლობა 2025 წლის ოქტომბრამდე აღარ ეკუთვნის. აქვე დავაზუსტებთ, რომ პენიტენციური კოდექსის 119-ე და 122-ე მუხლების შესაბამისად, მსჯავრდებულს 1 წლის განმავლობაში აქვს 3 ხანგრძლივი პაემნის უფლება, რომლით სარგებლობაზეც უარს თავად აცხადებს (აღნიშნული დასტურდება შესაბამისი დოკუმენტაციით).
რაც შეეხება მსჯავრდებულის ხანმოკლე პაემანს მინის გამყოფ ბარიერს მიღმა, საზოგადოების ინფორმირების მიზნით განვმარტავთ, რომ პენიტენციური დაწესებულების დებულებით, ეს წესი მოქმედებს აღნიშნულ პენიტენციურ დაწესებულებაში მყოფი ყველა მსჯავრდებულისთვის. სპეციალური პენიტენციური სამსახური მოუწოდებს ყველას, თავი შეიკავონ დაუზუსტებელი და ცრუ ინფორმაციის გავრცელებისგან, რომელიც სამსახურის დისკრედიტაციასა და საზოგადოების შეცდომაში შეყვანას ისახავს მიზნად." - ნათქვამია განცხადებაში.
ცნობისთვის, 22 სექტემბერს, გიორგი ჩიკვაიძის დედამ, ეკა წერეთელმა სოციალურ ქსელში დაწერა, რომ მის შვილს "აუკრძალეს პირისპირ შეხვედრა მშობლებთან", ამ გადაწყვეტილებას ოჯახის წევრები, როგორც თვითონ აცხადებდნენ, ნოდარ მელაძის შაბათში გასულ რეპორტაჟს უკავშირებდნენ, ამის შესახებ ინფორმაცია ტევე პირველმაც გაავრცელა. დღეს, გიორგი ჩიკვაიძემ შიმშილობა დაიწყო.
