პენტაგონის ცნობით, აშშ-მ უკრაინისთვის HAWK-ის ტიპის III ფაზის სარაკეტო სისტემის, Bradley-ის ტიპის საბრძოლო ჯავშანმანქანებისა და ამ შეიარაღებისთვისა და მათი შენახვისთვის საჭირო აღჭურვილობის, მომსახურებისა და დოკუმენტაციის შესაძლო მიყიდვა დაამტკიცა.
Bradley-ს ტიპის საბრძოლო მანქანები და აღჭურვილობა უკრაინას დაახლოებით 150 მილიონი დოლარი დაუჯდება, ხოლო HAWK-ის ტიპის სარაკეტო სისტემები - დაახლოებით 172 მილიონი დოლარი.
აშშ-ს თავდაცვის უსაფრთხოების თანამშრომლობის სააგენტომ (DSCA) კონგრესს შესაძლო მიყიდვასთან დაკავშირებით საჭირო სერტიფიკაცია გადასცა.
Bradley არის ჯავშანმანქანა, რომელსაც 25მმ-იანი ქვემეხით და ტანკსაწინააღმდეგო რაკეტებით სამიზნეებზე თავდასხმისას ჯარისკაცების ფრონტზე გადაყვანა შეუძლია, ხოლო HAWK-ის ტიპის სარაკეტო სისტემები საშუალო მანძილის “მიწა-ჰაერის” ტიპის სისტემაა.
DSCA-ს განცხადების თანახმად, უკრაინის მთავრობამ HAWK-ის სარაკეტო სისტემისთვის საჭირო აღჭურვილობისა და მომსახურების შესყიდვა ითხოვა, მათ შორის, სისტემისა და რაკეტების სათადარიგო ნაწილები, ტექნიკური დოკუმენტაცია, წვრთნები, აშშ-ს მთავრობისა და კონტრაქტორის ტექნიკური მხარდაჭერა და ა.შ.
“შეთავაზებული მიყიდვა აშშ-ს საგარეო პოლიტიკის მიზნებსა და ეროვნული უსაფრთხოების ამოცანებს დაეხმარება უკრაინის მხრიდან საკუთარი თავდაცვის უზრუნველყოფის შესაძლებლობის გაძლიერებით.
შეთავაზებული მიყიდვა გააუმჯობესებს უკრაინის შესაძლებლობას, გაუმკლავდეს ახლანდელ და სამომავლო საფრთხეებს მისი დამატებით შეიარაღებით”. - წერია განცხადებებში.
